Shymkent ákimi qurylysqa jaýapty adamdardy qatań jazalaıtynyn aıtty
ShYMKENT. QazAqparat - Shymkent qalasynda jýyrda ǵana salynǵan kópqabatty úılerdiń qabyrǵalary jarylyp, tóbesinen sý aǵyp jatyr. Al mektepter men jataqhanalardyń sylaqtary túsip, jaryqtar paıda bolǵan. Qurylys máselelerine qatysty ótken jıynda shahar basshysy osyndaı kemshilikterdi sóz etip, qalalyq qurylys bóliminiń basshylyǵyn qatań synǵa aldy,dep habarlaıdy QazAqparat HAA tilshisi.
Aldymen qurylys bóliminiń basshysy Tájibaı Egetaevtyń esebin tyńdaǵan ákim keıinnen sheneýnikti suraqtyń astyna aldy. Sebebi, jańadan salynǵan áleýmettik nysandar nóser jaýynǵa tótep bere almaýda eken. Máselen, jeńil atletıka men velosporttan olımpıada rezervin daıyndaıtyn №2 mekteptiń sport zalynyń qabyrǵalary jarylyp ketken. Artynsha merdiger jóndegenimen, qaıtadan jaryqtar paıda bolypty.
«№40 jataqhananyń tóbesinen sý aǵyp, qabyrǵalary sógilip ketken. Jaýyn sýy ishke kirip, sylaqtary túsken. Bastapqyda, bul ǵımarat apatty dep tanylǵan úılerdiń turǵyndaryn ýaqytsha ornalastyrý úshin salynǵan eken. Alaıda, ǵımarattyń ózi apatty jaǵdaıda tur», - dedi ákimdiktiń bólim basshysy Móldir Keýenova.
Sol sııaqty jıynda «Saıram» shaǵyn aýdanyndaǵy bir mekteptiń dálizi standartqa saı kelmeıtini jáne taǵy bir bilim mekemesiniń janyndaǵy alańsha joqtyǵy da aıtylyp qaldy. Osyny estigen qala ákimi qurylys bóliminiń basshysyna qatań eskertýler jasady.
«Bul ne degen jaýapsyzdyq?». Osyny basynan bastap durys jasaýǵa bolmaı ma? Sizder ǵoı, konkýrsty ótkizip, merdigerlerdi tańdaǵan. Shaqyryńyzdar da, tez jóndeńizder»-dedi Ábdirahymov.
Kemshilikter munymen shektelmedi. Belgili bolǵandaı, «Nursát» shaǵyn aýdanynda byltyr ǵana paıdalanýǵa berilgen kópqabatty úıler de sapasyz salynǵan. Jańa úılerdiń keıbiriniń qabyrǵalary jarylyp jatsa, endi biriniń sý sorý qurylyǵylary durys ornatylmaı, jertóleler sýǵa tolyp ketipti. Bir podezde lıft bolsa, ekinshisinde atymen joq. Bul baspanalar salynbaı jatyp apatty nysandardyń qataryn tolyqtyrýy múmkin. Osy máselege oraı qurylys bóliminiń basshylyǵynan mardymdy jaýap ala almaǵan qala basshysy úılerdi salýǵa qatysqan barlyq merdigerlerdi jınap, kezdesetinin aıtty. Bólim basshysy Tájibaı Egetaevqa qatań shara qoldanatynyn atap ótti.
«Sizge synaq merzimi retinde 3 aı beremin. Eger mundaı jaǵdaı qaıtalanatyn bolsa eshkimdi de aıamaımyn. Óte qatań áńgime bolady. Túsinikti me?»,- dedi Ǵabıdolla Ábdirahymov.
Aıta keteıik, Shymkentte qurylys salasyna jyl saıyn qomaqty qarajat bólinedi. Máselen, ótken jyly 60 nysan salýǵa 18 mlrd teńge qaralsa, bıylǵy jylǵa 24 úıdiń qurylysyna 13 mlrd teńge qarjy berilip otyr.
