Shymkent ákimi kepteliske renish bildirgen júrgizýshilerdi qoǵamdyq kólikpen júrýge shaqyrdy
ShYMKENT. QazAqparat - Shymkenttiń ákimi kepteliske kóńili tolmaǵan júrgizýshilerdi jaıaý nemese qoǵamdyq kólikpen júrýge shaqyrdy. Ol kólik keptelisine bola kóshelerdi keńeıtpeıtinin, ondaǵy aǵashtardy basqa jaqqa kóshirmeıtinin málimdedi.
Bul sheshimdi qala ákimshiligi turǵyndardyń kósheni keńeıtpeýge suranys bildirgeni úshin qabyldaǵan, dep habarlaıdy QazAqparat HAA tilshisi.
Jolǵa jaýapty sala basshylarynyń basyn qosqan jıynda Baıtursynov kóshesiniń jaıy sóz boldy. Sebebi, kólik keptelisi kóbeıgen bul kósheniń keńeıtiletini, ondaǵy qurylys nysandarynyń súriletini jyldar boıy aıtylyp keledi. Tipti shahar basshylyǵy keptelisti boldyrmas úshin aǵashtardy da basqa jaqqa kóshirmek bolǵan. Alaıda Ǵabıdolla Ábdirahymov búgin kepteliske bola eshteńe ózgermeıtinin málimdedi.
«Kóptegen iri qalalarda keptelis bolmas úshin bar jaǵdaılar jasalady. Bul jumystardyń barlyǵy ortalyq kóshelerde kólikterdi azaıtý maqsatynda jasalady. Qala basshylary ol úshin halyqtyń negizinen qoǵamdyq kólikterde júrýi úshin kúsh salyp, aıaqjoldar salady. Biz de budan bylaı Baıtursynov kóshesindegi kepteliske kóńili tolmaǵan júrgizýshilerdiń aıtqanymen júrmeıtin bolamyz. Olar úshin aǵashtardy kesip, joldy keńeıtpek emespiz. Joldyń tarlyǵyna kóńilińiz tolmaı ma, qoǵamdyq kólikke otyryńyz. Ne bolmasa velosıped minińiz, jaıaý júrińiz. Jol keptelis máselesin sheshý úshin aıaldamalarǵa arnaıy qalta salynyp, kóshe boıynda qosymsha abattandyrý jumystary júrgiziletin bolady»,-dedi qala ákimi.
Eske sala keteıik, osy jyly Baıtursynov kóshesiniń keptelis máselesi qıyndyq týdyrǵan soń, Táýke han dańǵylynan T. Rysqulov kóshesine deıin joldyń keńeıtilýi josparlanǵan bolatyn (8 metrden 21 metrge deıin). Joba boıynsha, jalpy uzyndyǵy 3,2 shaqyrym quraıtyn kóshedegi 900-ge jýyq tal-daraqtar arnaıy tehnıkalyq quraldarmen basqa jerge otyrǵyzylýy tıis bolatyn.
Shahar basshysy sondaı-aq tenderdi jeńip alǵan merdigirlerge joldar men aıaqjoldar salǵanda estetıkaǵa nazar aýdarý qajettigin atap ótti. Ári aldaǵy ýaqytta sapasyz oryndaǵan jumystar qabyldanbaıtyndyǵyn, kemshilikter túzetilmeıinshe tólemaqy berilmeıtinin jetkizdi.
Aıta keteıik, bıylǵy jyly qaladaǵy kólik ınfraqurylymynyń damýyna 14 mlrd. teńge shamasynda qarajat bólinip, qalanyń 225 kóshesinde jóndeý jumystary atqarylmaq.
