Shymkent ákimi kásipkerlerdi birlesip jumys isteýge shaqyrdy
Jıynda shahar basshysy shaǵyn jáne orta bıznes ókilderin jeńil jáne jıhaz ónerkásibin, qurylys ındýstrııasyn damytýda birlese jumys icteýge úndedi.
«Elbasy óz Joldaýynda «qarapaıym zattar ekonomıkasyn» damytý mindetin qoıǵan bolatyn. Ol negizinen shaǵyn jáne orta kásiporyndarǵa tıesili. Búginde Shymkentte shaǵyn jáne orta kásipkerliktiń jalpy óńirlik ónimdegi úlesi 25 paıyzdy quraıdy. Degenmen bul áli de az. Sondyqtan kásipkerlerdi osy úlesti arttyrýǵa, damytýǵa shaqyramyn. Oǵan qalamyzdyń adamı jáne materıaldyq-resýrstary jetkilikti. Kúndelikti tutynylatyn zattardy óndirý nátıjesinde biz azamattardy jumyspen qamtımyz jáne ımportty azaıtamyz»,- dedi qala ákimi.
Sondaı-aq, kezdesýde atalǵan baǵyt boıynsha qabyldanǵan jol kartalary men atqarylatyn is-sharalar boıynsha qala ákiminiń orynbasary Danat Jýmın, áleýetti jobalardy qarjylandyrý jáne olardy sýbsıdııalaý mehanızmderin túsindirý boıynsha «Damý qory» AQ Shymkent qalasy fılıalynyń dırektory Jambyl Qaldarov baıandama jasady.
Aıta keteıik, qalada jeńil jáne jıhaz ónerkásibiniń, qurylys materıaldary óndirisiniń Jol kartasy ázirlengen. Onyń aıasynda 76 gektar jer telimine «Juldyz» ınstýrıaldy aımaǵynyń qurylysy josparlanýda. Sondaı-aq, jeńil ónerkásip salasyn damytý maqsatynda «Ońtústik» arnaıy ekonomıkalyq aımaǵynyń aýmaǵyn 200 gektardan 500 gektarǵa deıin keńeıtý josparlanýda. Nátıjesinde 30 óndiristik kásiporyn, 3 myńnan astam jańa jumys oryndaryn ashýǵa múmkindik bar. Memleket basshysynyń tapsyrmasyn oryndaý aıasynda qalada óńdeý ónerkásibindegi ósý qarqynynyń esebinen ártaraptandyrýdy odan ári damytyp, myńdaǵan ónimdiligi joǵary turaqty jumys ornyn qurý kózdelýde.
