Shymkent ákimi: Qala kúnin merekeleýdi senbilikten bastaımyz
ShYMKENT. QazAqparat - Shymkentte qala kúni merekesi apta boıy atalyp ótpek. Bul týraly qala ákiminiń orynbasary Qaırat Nurtaı jergilikti BAQ ókilderine arnalǵan brıfıngte málim etti, dep habarlaıdy QazAqparat HAA tilshisi.
Qaırat Nurtaıdyń aıtýynsha, qalalyq mádenıet bólimi 23-30 qyrkúıek kúnderine arnalǵan merekelik baǵdarlamany uıymdastyryp qoıǵan.
«Bıylǵy qala kúni merekesi Elbasynyń «Bolashaqqa baǵdar: rýhanı jańǵyrý» atty maqalasymen úndes atalyp ótpek. Merekelik baǵdarlama 23 qyrkúıek, ıaǵnı, senbi kúni arnaıy jalpyqalalyq senbilikten bastaý alady. Keń aýqymdy mádenı, sporttyq sharalar kópshiliktiń kóńilinen shyǵýy tıis», - deıdi Qaırat Yrzaqululy.
Al merekeni qorytyndylaıtyn gala-kontsertke Qaırat Nurtas, Qydyráli men Qaraqat, Erke Esmahan, Beıbit Kýshkalıev, Abaı Begeı syndy Qazaqstan estradasynyń ánshileri men "Format" jáne "MBAND" toptary qatysady dep kútilýde.
Aıta keteıik, merekede «Jastar» ortalyǵynyń alańynda «Shymkent Arbaty» qolóner buıymdarynyń jármeńkesin, «Táýelsizdik» saıabaǵyndaǵy bas qaqpa - Naýryz alańynda turǵyndardyń qatysýymen velomarafon, ortalyq saıabaqta ardagerler men 11-14 jas aralyǵyndaǵy jasóspirimder arasynda shahmattan týrnır, jańa kitaphana ǵımaratynyń ashylý saltanatyn, 6-20 jas aralyǵyndaǵy jastar arasynda kishi fýtboldan jarys, «Otbasy alleıasynda» jas otbasyn qurǵan azamattarǵa arnalǵan merekelik baǵdarlama ótkizý jáne oqýshylar saraıynda «Taza qala» aktsııasyn qorytyndylaý josparlanyp otyr.
Sonymen qatar «Shyraıly Shymkent» BAQ ókilderi arasyndaǵy baıqaýdyń jeńimpazdaryn marapattaý rásimi men qala ákiminiń osy kúni týylǵan «Eń jas» jáne «Eń qart» azamatyn quttyqtaýy, qaıyrymdylyq aktsııa men kóńildi tapqyrlar komandalary arasyndaǵy oıyndar, aýyl sharýashylyq ónimderiniń jármeńkesi men saıabaqtarda kópshilik serýender, ortalyq ıppodromda ulttyq sport oıyndary men Ál-Farabı alańynda «Súıikti Shymqalam» karnaval sherý, «Jastar resýrstyq ortalyǵynda» talantty balalar men jastar arasynda bı, vokal janry boıynsha baıqaý men Qazaq handyǵynyń 550 jyldyǵy monýmentinde kontserttik baǵdarlama bolady dep kútilýde. Budan ózge dendrosaıabaqta «Bolashaq Shymkent» jastar forýmy men «Jaılaýkól» demalys aýmaǵynda sporttyq oıyn túrlerinen jarystar, Naýryz alańynda teatrlandyrylǵan kórinis uıymdastyrylmaqshy.
