Shymkent ákimi «Disneyland» qaı jerde salynatynyn aıtty

NUR-SULTAN. QazAqparat – Shymkent qalasynyń ákimi Erlan Aıtahanov «Disneyland» oıyn-saýyq baǵynyń qaı jerde salynatynyn aıtty, dep habarlaıdy QazAqparat tilshisi.

«Dısneılend boıynsha oryn belgilendi. Balalarǵa arnalǵan oıyn-saýyq baǵy Badam ózeniniń jaǵasynda salynady. Joba quny – 20 mlrd teńge. Sıngapýrdan kelgen ınvestorlarmen kezdestik. Olar qazir isti birlese júzege asyratyn ınvestorlardy izdestirip jatyr. Kelesi jyly máseleni tolyq sheshemiz degen oıdamyz», - dedi ol OKQ-da ótken baspasóz máslıhatynda.

Aıta ketsek, buǵan deıin qala basshysy ártúrli salada qandaı jumys júrgizilip jatqanyn jetkizgen bolatyn. Onyń aıtýynsha, qoǵamdyq kólikter 600-ge jýyq jańa avtobýspen tolyǵyp, aldaǵy úsh jylda 10 mektep salynady.

Sondaı-aq, shymkenttik kompanııa toqyma ónimderin Túrkııa, Qytaı, Ońtústik Koreıa, Italııa, Reseı elderine eksportqa shyǵarýdy kózdep otyr.