Shymkent ákimi alty aıda atqarǵan jumystary jóninde esep berdi

ShYMKENT. QazAqparat - Shymkenttiń ákimi Ǵabıdolla Ábdirahymov qalalyq máslıhattyń kezekten tys elý ekinshi sessııasyna qatysyp, alty aıda atqarǵan jumystary jóninde esep berdi. Shahar basshysynyń esebine depýtattarmen qatar zııaly qaýym ókilderi de qatysty, dep habarlaıdy QazAqparat tilshisi.

Máslıhattyń kún tártibinde Shymkent qalasy ákiminiń oǵan júktelgen fýnktsııalary men mindetterdiń oryndalýy týraly esebi tyńdaldy. Ǵabıdolla Ábdirahymov jyl basynan beri qalanyń áleýmettik-ekonomıkalyq damý kórsetkishterin baıandap, ındýstrııalandyrý, ınvestıtsııa tartý, ınfraqurylym, áleýmettik salalardyń damý kórsetkishterine toqtaldy. Ákimniń sózinshe, esepti kezeńde ónerkásip óniminiń kólemi 25 paıyzǵa, ortasha aılyq jalaqy 12 paıyzǵa artqan. Qala bıýdjeti 219 mlrd teńgege jetip, 79 mlrd teńgege ulǵaıǵan. Al, ındýstrııalandyrý kartasy aıasynda 3 joba júzege asyrylýda. Kásipkerlik sýbektileriniń sany 14 paıyzǵa ósip, 65 687 birlikti quraǵan. Qalada 6345 páterli 129 kópqabatty turǵyn úıdiń qurylysy júrgizilip, jańadan 14 334 jumys orny ashylǵan.

«2019 jyl jaqsy jetistiktermen bastaldy. Osy aralyqta memlekettik basqarý júıesin qamtamasyz etip, qala ákimdigi, máslıhat janyndaǵy konsýltatıvtik keńester quryldy. 19 maýsymda qalanyń respýblıkalyq statýs alǵanyna 1 jyl toldy. Jyl basynan beri ınvestorlarmen kóptegen kelisimder jasaldy. Baǵdarlamalar daıyndaldy. Biz osy jumystardy ári qaraı jalǵastyrýymyz kerek. Oǵan barlyqtaryńyzdy atsalysýǵa shaqyramyn», - dedi qala ákimi.

Máslıhat depýtattary qala ákiminiń esebin oń baǵalady. Qala máslıhatynyń hatshysy Ǵanı Tashqaraev óz sózinde shaharda kásipkerlikti damytý, jastardy qoldaýda kóptegen jobalar qolǵa alynǵanyn, barlyq salada ósý bar ekenin atap ótti.