Shymkent ákimi A-2 aınalma jolynyń sapasy týraly: qaıtadan jańa asfalt tóseledi

ASTANA. QazAqparat – Shymkent qalasynyń ákimi Murat Áıtenov ortalyq kommýnıkatsııalar qyzmetinde ótken brıfıngide «A-2» aınalma jolynyń jańa tóselgen asfalti nelikten qoparylyp jatqanyn aıtty, dep habarlaıdy QazAqparat tilshisi.

«A-2» aınalma joly 2024 jyly salynyp bitedi delingen edi. Biraq ol merzimde aıaqtalatynyna kúmán kóp. Sapasy týraly aıtý tipten qıyn. Óıtkeni joldyń jańadan salynǵan tusy qazirdiń ózinde jaramsyz kúıge jetip jatyr. «Kommýnızm» bólimshesiniń aýmaǵy qazir oıdym-oıdym. Jol salynyp bitkenniń ózinde sapasyna qansha jyl kepildik beriledi?», - dep surady BAQ ókili.

Ákimniń aıtýynsha, qazir oıdym-oıdymy shyǵyp jatqan asfalt ýaqytsha tóselgen.

«Qalada keptelis bolmasyn dep joldyń eki baǵytyn kezek-kezek jaýyp, jumys istep jatyrmyz. Biraq joba bitken joq. Bul merdiger esebinen ýaqytsha tóselgen nárse. Ol jerdegi asfalttiń ózi de sapasy tómendeý. Biraq ol bir jylǵa tóselgen. Erteń eki betin aıaqtaǵannan keıin qyryp tastap, jańadan asfalt tóseledi», - dedi Murat Áıtenov.