Shymkent ákimdiginiń jumysyna qatysty halyqtan 10 myń shaǵym túsken

ShYMKENT. QazAqparat - Shymkent qalasynda «Bizdiń jumysymyzdy baǵalańyz» aktsııasy uıymdastyryldy, dep habarlaıdy QazAqparat qala ákiminiń baspasóz qyzmetine silteme jasap.

Osylaısha, el aýmaǵyndaǵy úshinshi megapolıstiń ákimdigi árbir sala jumysyndaǵy eń ózekti máselelerdi anyqtaýdy qolǵa aldy. Saýalnama qorytyndysy boıynsha, jol kartasy, ıaǵnı, azamattardyń ótinishteri boıynsha túıtkildi máselelerdi sheshýge baǵyttalǵan ákimdik áreketiniń jospary daıyndalmaq.

Saýalnama nátıjesi boıynsha, shaǵymnyń basym kópshiligi qoǵamdyq kóliktiń jumysy men avtojoldardyń sapasyna qatysty bolǵan. Oǵan qatysty 2074 azamat pikir bildiripti. Azamattar jolaýshylar kóliginiń jetispeýshiligin, qyzmet kórsetý sapasynyń tómendigin aıtyp shaǵymdanǵan. Taǵy bir ózekti másele retinde, jol qaltashalary men pavılondardyń azdyǵy synǵa alynǵan. Turǵyndar sonymen qatar, nazardan tys qalyp qoıǵan keıbir qala kóshelerine qıyrshyq tas nemese asfalt tóseýdi surady.
Saýalnama qorytyndysynda, ekinshi oryn - turǵyn úı-kommýnaldyq sharýashylyq salasyna qatysty boldy.

Atalmysh sala boıynsha 1995 shaǵym túsipti. Qala turǵyndarynyń negizgi saýaldary kommýnaldyq járdemaqylardyń joqtyǵyna, sondaı-aq, aýla aýmaqtaryn abattandyrýǵa jáne qoqystardy joıýǵa qatysty boldy.
úshinshi orynda - jergilikti polıtsııa qyzmeti. Bul sala boıynsha 1328 shaǵym tirkelgen. Azamattar polıtsııa qyzmetkerleri ózderiniń tikeleı mindetterin oryndamaıtynyn jáne qyzmet sapasynyń nashar ekenin atap ótken.
Qala turǵyndaryn jer qatynastary salasynyń máseleleri de alańdatady. Bul salada 180 azamat jer telimderin bólý jáne olardy odan ári zańdastyrýǵa baılanysty, sondaı-aq memleket muqtajdyǵyna alynǵan jer telimderine beriletin ótemaqy somasynyń tym tómendigin ótkir synǵa alǵan.
Mektepter men balabaqsha ǵımarattarynyń qurylysy da ózekti máseleler qatarynda. Bul sala boıynsha 218 shaǵym qabyldanǵan. Qalanyń emhanalary men aýrýhanalarynda kórsetiletin qyzmet sapasy da osy kórsetkishke jeteqabyl. 

Aıta keteıik, saýalnama barysynda barlyǵy 10 myńǵa jýyq shaǵym qabyldanǵan. Saýalnama offlaın rejımde de, onlaın júıesinde de júrgizildi. Aktsııanyń merzimi 4 tamyzǵa deıin, ıaǵnı, shekteýli bolsa da, azamattardyń saýaldary men shaǵymdaryn qabyldaý munan ári de ákimdiktiń áleýmettik jelilerinde jalǵasyn tabady.