Shymkent ákimdigi koronavırýstyń órshý qaýpine qalaı daıyndalyp jatyr
«Qaladaǵy epıdemılogııalyq ahýalǵa toqtalar bolsam, osy jyldyń 24 naýryzynan 16 qarashaǵa deıingi aralyqta COVID-19 aýrýyn 5 292 adam juqtyrdy. Koronavırýstyń yqtımal tolqynyna úsh stsenarıı boıynsha daıyndaldyq. A, V, S jospary boıynsha 5 416 tósek ornyna deıin ázirleýge múmkindik bar. Qalada jalpy qýattylyǵy kúnine 3550 testke jetetin 9 PTR zerthana bar. Jańadan 100 jedel járdem avtokóligi alynyp, avtopark tolyǵymen jańartyldy. Jańa call-center iske qosyldy. Qońyraý qabyldaý qýattylyǵy táýligine 3 500-ge jetti», - deıdi Murat Áıtenov.
Shymkent qalasynyń ákimi sonymen qatar, bıyl 6,4 mlrd teńgege 7 medıtsına mekemeniń ǵımaratyna kúrdeli jóndeý jumystary júrgizilgenin aıtady. Al materıaldyq-tehnıkalyq jabdyqtaýǵa 6 mlrd 600 mln teńge bólý kózdelgen. Búgingi tańda qalada 19 kompıýterlik tomografııa apparattary jumys istep tur.
«Jyl basynda qalada ókpeni jasandy jeldetýdiń 310 apparaty bolsa, qazir olardyń sany 612-ge jetti. 3 ottegi stantsııasy ornatyldy. Budan bólek suıyq ottegige arnalǵan 9 rezervýar ornatý jumystary júrgizilýde. Medıtsınalyq uıymdarda COVID-19 indetine qarsy eki aılyq dárilik zattar jáne medıtsınalyq buıymdar qory qalyptasty, qorǵa 659 mln teńge bólindi. Qaladaǵy dárihanalar monıtorıng jasalýda. Búgingi kúni qalanyń dárihanalarynda koronavırýsty emdeýge qajet 1,7 mlrd.teńge kóleminde dári-dármek qory bar», - deıdi ol.
Murat Áıtenov tótenshe jaǵdaı kezenińde tabysynan aıyrylǵan azamattarǵa «Memlekettik áleýmettik saqtandyrý qory» esebinen áleýmettik tólem berý jumystary júrgizilgenin aıtady. Osylaısha birińshi kezeńde 285 551 adamǵa 19,9 mlrd teńge, ekinshi kezeńde 143 519 adamǵa 6,1 mlrd teńge kóleminde áleýmettik tólem berilgen. 41 myńnan astam az qamtamasyz etilgen otbasyǵa «Biz birgemiz» qoǵamdyq qorynan 50 myń teńgeden, 17 myńnan astam azamattardyń kommýnaldyq shyǵystary memlekettik bıýdjetten ótelgen.