Shymkent ákimdigi balalardyń jazǵy demalysyna bólingen qarjyny qazynaǵa qaıtarady

NUR-SULTAN. QazAqparat - Shymkent ákimdigi balalardyń jazǵy demalysyna bólingen qarjyny memleket qazynasyna qaıtarady. Bul týraly QR Qarjy mınıstrligi Memlekettik satyp alýlar zańnamasy departamentiniń dırektory Sábıt Ahmetov aıtty, dep habarlaıdy QazAqparat tilshisi.

Ortalyq kommýnıkatsııalar qyzmetindegi baspasóz máslıhatynda BAQ ókilderi departament dırektorynan «memlekettik satyp alýlar saıtynda Shymkent ákimdigi shamamen 200 mln teńgege 6 myń balaǵa jazǵy saýyqtyrý lagerine joldama satyp alý týraly lot ornalastyrǵanyn, jazǵy lager bolmaǵandyqtan atalǵan satyp alýdyń taǵdyry ne bolatyndyǵyn» suraǵan edi.

«Biz Shymkent qalasy ákimdiginen karantınge baılanysty lagerlerde eshqandaı demalys bolmaǵandyǵy týraly aqparat aldyq. Máslıhat sheshimimen atalǵan aqsha sheship alyndy. Bul qyzmetterdiń kelisimshart jasalǵan áleýetti jetkizýshisine kelisimsharttyń buzylatyndyǵy týraly habarlama jiberildi», - dep túsindirdi Sábıt Ahmetov.