Shymbulaqta reseılik tóreshiniń qaza bolýynyń mán-jaıy anyqtaldy
ASTANA. QazAqparat - Shymbulaqta qar kóshkini saldarynan kóz jumǵan reseılik tóreshini izdestirýdiń mán-jaıy belgili boldy, dep habarlaıdy QazAqparat.
QR ІІM Tótenshe jaǵdaılar komıtetiniń málimetinshe, saǵat 14:06 kezinde biryńǵaı dıspetcherlik qyzmetine Shymbulaq qutqarýshylaryna Spartak Alemasov esimdi RF azamaty habarlasqandyǵy týraly aqparat kelip tústi. Ol óz sózinde taýdyń batys bókterinde trassadan tys syrǵanaý kezinde qar kóshkini oryn alyp, qar qursaýynda adam qalǵandyǵyn aıtqan.
Oqıǵa ornyna shuǵyl túrde Ýnıversıada nysanyn kúzetýge jumyldyrylǵan kúshter baǵyttaldy. Jalpy, QR ІІM Tótenshe jaǵdaılar komıtetiniń respýblıkalyq jedel-qutqarý jasaǵynyń 50-ge jýyq adamy qar kóshkini ornyna bardy.
«Qar kóshkini oryn alǵan aýmaq birden anyqtaldy. Shamaly ýaqyttan keıin izdestirý sharalaryna qosylǵan ıtterdiń biri naqty jerdi taýyp berdi»,-dedi QR ІІM Tótenshe jaǵdaılar komıtetiniń resmı ókili Rýslan Imanqulov.
Saǵat 15:23 kezinde qutqarýshylar 1986 jyly týǵan Beloslýdtsev Alekseı Nıkolaevıch esimdi Reseı Federatsııasy azamatynyń denesin qar qursaýynan alyp shyqty.
Saǵat 16:14-te izdestirý tobynda bolǵan medıtsınalyq kómek dárigerleri reanımatsııalyq áreketterden keıin sportshynyń ólgendigin naqtylady.
Ajal qushqan azamat reseılik Krasnoıarsk qalasynan frıstaıl boıynsha delegatsııa quramynda kelgen tehnıkalyq tóreshi bolǵan.
«Qaıǵyly oqıǵa Ýnıversıadanyń sporttyq trassasynan tys aýmaqta syrǵanaý saldarynan oryn aldy. Kóz jumǵan adamnyń dosy óz sózinde syrǵanaý kezinde buǵan deıin qarǵa iz salynbaǵan taý bókterin arnaıy tańdap otyrǵandyqtaryn aıtty. Sonymen qatar olar bul aýmaq syrǵanaýǵa tyıym salynǵanyn túsine otyryp, frıraıdpen aınalysqan» ,-dedi Imanqulov.
«Qazseldenqorǵaý» MM-niń málimetinshe, kóshkin qardyń kólemi 350 tekshe metrdi qurady.
Sonymen qatar TJK óz habarlamasynda 2017 jyldyń 30 qańtarynda Almaty qalasynyń Tótenshe jaǵdaılar departamenti turǵyndarǵa qar kóshkininiń bolýy qaýpi týraly aqparat taratqanyn eske salyp ótti.
