Shymbulaqta ne ózgerdi: jańa ájethana, 3 qar atý júıesi

ALMATY. QazAqparat - «Shymbulaq» kýrortyndaǵy ózgerister týraly Instagram paraqshasynda kýrort dırektory Erjan Erkinbaev aıtty, dep habarlaıdy QazAqparat tilshisi.

Birinshiden, taý shańǵysy kýrortynyń joǵarǵy jaqtarynda qar atý júıesi kúsheıtilgen.

«Jaz boıy biz qar atýdyń 3 jańa tarmaǵyn jasadyq. Endi 35 zeńbirek qar atýǵa daıyn. Shymbulaqqa qar jaýdyra bastaımyz. Shańǵymyzdy daıyndap, qysqy demalysqa shyǵamyz», - dedi Erjan Erkinbaev.

Sonymen qatar, «Shymbulaqtyń» joǵarǵy tusynda kópshiliktiń kópten kútken nysany - ájethana paıda boldy.

«3 jyl buryn biz Shymbulaqta asa kúrdeli jobany qolǵa alǵan bolatynbyz. Ol - Talǵar asýynda ájethanalar jelisin salý. Qurylys ýaqyty qysqa, aýa raıynyń ahýaly qatań bolǵan soń ájethanany iske qosý qıyndap ketti. Endi bir tanymal kisilerdi shaqyryp, qyzyl lenta keskizip, at qoısaq ta bolady», - dedi Erjan Erkinbaev.

Munyń aldynda áleýmettik jelide Shymbulaq taý shańǵysy kýrortynda adamdarǵa qolaıly jaǵdaı jasalmaǵany kóp talqylanǵan bolatyn. Onda birneshe shaqyrymǵa sozylǵan keshen ishinde bir de bir ájethana joqtyǵy synǵa alynǵan edi.