Shymbulaqta Qazaqstan týrızmin damytý máseleleri talqylandy
Kezdesýdi QR Mádenıet jáne sport vıtse-mınıstri Órken Bısaqaev ashyp, qazirgi kúrdeli jaǵdaıda naryqty nyǵaıta otyra bıznes pen memleket arasynda syndarly dıalog qurý qajettigin atap ótti.
Kezdesý barysynda 2020-2021 qysqy maýsymyna taýdaǵy daıyndyq jáne ulttyq parkterde ekotýrızmdi damytý máseleleri talqylandy.
Jyl boıy jumys isteıtin Shymbulaq taý kýrortynyń prezentatsııasy barysynda kompanııanyń bas dırektory Rınat Ábdirahmanov týroperatorlarmen birge pakettik usynystardy qalyptastyrýǵa erekshe nazar aýdaryp, týrıstik qaýymdastyqtar basshylarymen kýrortty odan ári damytýdy talqylady.
«Taý shańǵysy demalysyn uıymdastyrý Qazaqstanda óte perspektıvaly bıznes. Óıtkeni sheteldik týrısterdiń bizdiń taýlarymyzǵa degen qyzyǵýshylyǵy bar jáne bizdiń týrısterdiń Eýropanyń nemese Ortalyq Azııa elderiniń sheteldik taý shańǵy kýrorttaryna degen suranysy da bar», - deıdi Turan Asia LLP dırektory Gúlǵaısha Qasenhanqyzy.
Statıstıkaǵa sáıkes, taýshańǵy demalysyn unatatyn týrıst kúnine ortasha eseppen 250 dollar jumsaıdy. Al jaǵajaıǵa baratyn týrıst tek 50 dollar shyǵyndaıdy.
«Kazakh Tourism UK» AQ-dan málim etkendeı, kezdesýdiń ekinshi bólimi tolyǵymen ekotýrızm jáne týrısterdiń ekologııalyq saýattylyǵyn arttyrý máselelerine arnaldy.
«Tamyr» jabaıy tabıǵatta bolý mektebiniń ıdeıalyq jetekshisi Ásel Isanova týrısterdi qorshaǵan ortaǵa uqypty qaraýǵa úıretý josparlary týraly aıtyp berdi.
«Biz jurtshylyqqa taýdaǵy júris-turys erejelerin qoǵamdyq dárister, aqparattyq týrlar, bilim berý jáne shabyttandyratyn medıa kontent arqyly tanystyratyn bolamyz. Bizdiń basty maqsatymyz – adamnyń tabıǵatta qaýipsiz bolýyn, sondaı-aq tabıǵatty adamnyń zııandy áserinen qorǵaýdy qamtamasyz etý», - deıdi Ásel Isanova.
Ári qaraı spıker mektep janynan eko-volonterlik qozǵalys qurylatynyn, oǵan bir aıda az ýaqyt ishinde 600-den astam adam tirkelgenin habarlady. Qozǵalysqa qatysýshylar arasynda mektep oqýshylary men stýdentterden basqa, kásibı eriktiler, shyǵarmashylyq adamdar, ekologtar, bıologtar, aqparattyq tehnologııalar salasyndaǵy mamandar jáne basqa da mamandandyrylǵan tulǵalar bar.
«Birlesken is-áreketterdiń arqasynda parktiń lastanýy, flora men faýnanyń joıylýy, týrıstik aǵyndardy retteý jáne basqa da mańyzdy máselelerdi sheshýge úlken úles qosa alatynymyzǵa senimdimin», - dep qorytyndylady Á.Isanova.
