Shymbulaq aýmaǵyna benzın, dızel jáne gazben júretin kólikterdiń kirýine tyıym salyndy
ALMATY. QazAqparat - «Shymbulaq» taý shańǵy kýrorty aýmaǵyna kólikterdiń kirýin shekteý shartaryna ózgeris engizildi, dep habarlaıdy QazAqparat tilshisi.
Qalalyq ákimdik taratqan málimetke sáıkes, kólik júktemesi men qorshaǵan ortaǵa antropogendik áserdi azaıtý maqsatynda Almaty qalasynyń ákimdigi 2016 jylǵy 8 sáýirdegi №2/122 «Almaty qalasynyń keıbir aýmaqtaryna kóliktiń kirýin shekteý týraly» qaýlysyna ózgerister engizildi. Ózgerister 2023 jyldyń 1 sáýirinen kúshine enedi.
«Elektrlik qozǵaltqysh avtokólikteri (elektrmobıl) men shuǵyl, jedel, kommýnaldyq jáne arnaıy qyzmetter men arnaıy tekhnıkadan basqa kólikterdiń barlyǵyna taý shańǵy kýrorty aýmaǵyna kirýge shekteý qoıylady. Qoldanylǵan sharalar kólikten shyǵatyn lastaǵysh zattardyń kólemin azaıta otyryp erekshe qorǵalatyn tabıǵı aýmaqta qorshaǵan ortaǵa tıgizetin keri áserdi tómendetýge múmkindik beretin bolady»,- dep habarlady ákimdiktiń baspasóz qyzmeti.
Al, «Medeý» MATP aýmaǵynda ornalasqan kásipkerlikpen aınalysatyn zańdy tulǵalarǵa tıesili jáne (nemese) solarǵa qyzmet kórsetetin kólikterge shekteý osy jyldyń birinshi qyrkúıeginen bastap kúshine enbek.
«Osy oraıda shaǵyn jáne orta bıznes sýbektilerine elektr qozǵaltqyshty kólik satyp alý úshin «Almaty» ÁKK» AQ qarasty «Almaty» MQU» arqyly 7 jylǵa deıingi merzimge 6% jyldyq mólsherlememen 30 mln deıin kepildi jeńildetilgen nesıe alý múmkindigi beriledi. Boryshkerdiń jeke menshigi satyp alynatyn kólik quralynyń 50%-nan kem bolmaýy tıis»,- dep atap ótti ákimdik ókilderi.
Eske sala keteıik, buǵan deıin sol jerdiń turǵylyqty turǵyndary men jekemenshik ıelerine qozǵaltqysh tıpine qaramastan «Shymbulaq» TK aýmaǵyna kirýge ruqsat etiletin.
Qazirgi kezde Almatyda shamamen 560 myń avtomobıl tirkelgen, (onyń ishinde elektromobıl sany 958), kún saıyn qala aýmaǵyna 200 myńnan astam kólik kiredi. Al onyń 58%-ynyń qoldanys merzimi 14 jyldan 40 jylǵa deıingi merzimdi quraıdy.
