Shylym shegýden Qazaqstanda jyl saıyn 25 myń adam kóz jumady - J.Battaqova
ASTANA. 29 qarasha. QazAqparat /Gúlmıra Alıakparova/ - Shylym shegýden Qazaqstanda jyl saıyn 25 myń adam qaıtys bolady.
Bul týraly búgin Astanada Temeki shegýden bas tartýdyń búkilálemdik kúnine oraı ótken baspasóz máslıhatynda Salaýatty ómir saltyn qalyptastyrý problemalary ulttyq ortalyǵynyń dırektory Jámıla Battaqova málim etti.
«Salaýatty ómir saltyn qalyptastyrý problemalary ulttyq ortalyǵynyń málimetterine sáıkes, búgingi kúni Qazaqstanda halyqtyń 27 paıyzy nemese 4 mln. 200 myń adam temeki shegedi. 2001 jylmen salystyrǵanda kórsetkish 4 paıyzǵa joǵarylady. Shylymǵa áýestenýshiler ásirese, áıelderdiń arasynda artýda. Eger buǵan deıin shylym shegetin 1 áıelge 5 er adamnan kelse, qazir bul araqatynas 1/3-ti qurap otyr. Onymen birge, bul indettiń balalar men jasóspirimder arasynda artýy qaýip týdyrady», - dedi ol.
J.Battaqova atap kórsetkendeı, shylym shegýden Qazaqstanda jyl saıyn 25 myń adam kóz jumady. Al álem boıynsha temeki jyl saıyn 6 mln.-ǵa jýyq adamnyń ólimine sebepshi bolady.
Ortalyq dırektorynyń aıtýynsha, ókpeniń qaterli isigi onkologııalyq aýrýlardyń qurylymynda birinshi orynda tur. Jaǵdaılardyń 90 paıyzynda ókpeniń qaterli isigin temeki týdyrady. Onymen birge, temeki bronhy men kómeıdiń isigine, mıokart ınfarkine, ınsýltke, túsikke, bedeýlikke, parodontozǵa, aǵzanyń jáne teriniń erte qartaıýyna alyp keledi, reprodýktıvti júıege keri áserin tıgizedi.
