Shyǵystyń úzdik kelini belgili boldy
NUR-SULTAN QazAqparat - Jyl saıyn ótip kele jatqan «Aıaýly jas kelin» baıqaýynda bıyl 17 úmitker baq synady, dep habarlaıdy QazAqparat tilshisi.
Oramal taqqan burymdylar arasyndaǵy saıys bıyl Jarma aýdanynyń Qalbataý aýylynda «Bolashaqqa baǵdar: rýhanı jańǵyrý» baǵdarlamalyq maqalasy aıasynda uıymdastyryldy.
Eki kezeńdik baıqaýda jas kelinder áýeli aspazdyq sheberlikterin pash etip, shaı demdep jaryssa, ekinshi kezeńde ónerin ortaǵa saldy.
Qos synnan da súrinbeı ótken semeılik kelin Aıdana Baýyrjanova baıqaýdyń bas júldesin jeńip alyp, kúlli Shyǵys jurtynyń «Aıaýly jas kelini» atandy. Bas júldegerge teledıdar tabys etildi. Al ekinshi oryn Abaı aýdanynyń kelini Maqpal Ebinge, úshinshi oryn Jarma aýdanynyń ókili Gúlmıra Jýsanbaevaǵa buıyrdy.
Jeńimpaz atanǵan kelindermen qosa basqa da qatysýshylar turmystyq tehnıkaǵa ıe boldy. 
