Shyǵystyń ózindik demokratııalyq dástúri bar - saıasattanýshy Kamal Burhanov
ALMATY. 6 qańtar. QazAqparat /Erlik Erjanuly/ - QR Parlamenti Májilisiniń depýtaty, saıasattaný ǵylymynyń doktory Kamal Burhanovtyń aıtýynsha, Qazaqstan damýdyń ózindik jolyn taba alǵan elderdiń biri. Bul pikirin saıasattanýshy búgin Almatyda ótken "Shyǵys-Batys dılemmasyndaǵy qazaqstandyq damý joly" dep atalatyn kitaptyń tusaýkeserinde aıtty.
"AQSh pen Eýropaǵa qaraǵanda Shyǵystyń damý modeliniń tamyry tereńde jatyr. Shyǵystaǵy halyqtardyń tili, dástúri, dili men dininde ǵana emes adamı qarym-qatynasta ózindik qundylyqtary bar. Sońǵy jyldary osy negizine súıengen Qytaı, Ońtústik Koreıa, Japonııa, Sıngapýr, Malaızııa, Taıvan sııaqty kóptegen elder damýdyń joǵary kórsetkishterin kórsetti. Al ózindik damý jolyn taba almaı, batystyq standarttardy qabyldaǵan burynǵy keıbir keńestik respýblıkalardaǵy "túrli-tústi" revolıýtsııalar qarama-qaıshylyqtardyń aıqyn dálel bola alady",- deıdi professor Kamal Burhanov.
Onyń aıtýynsha, Qazaqstan qazir qoǵamdyq damý jolynyń ózindik úlgisimen kele jatyr. Bul baǵytta ol ózge elderdiń ozyq tájirıbelerin de ózine áli de kóbirek sińirýi kerek. Sol sebepti fılosofııa ǵylymynyń doktory Saǵadı Bólekbaevpen birlesip jazǵan bul zertteýde oqyrmanǵa shyǵystyq modeldi barlyq oqyrmanǵa birdeı uǵynyqty túrde tanystyrýdy aldaryna maqsat etip qoıǵan. Osy kitapty jazyp shyǵarýǵa olar 3 jyldaı ýaqyttaryn jumsaǵan kórinedi.
