Shyǵystyń kásipkerleri bir jylda 39 mlrd teńge salyq tólegen
ÓSKEMEN. QazAqparat - Shyǵys Qazaqstan oblysy úshinshi jyl qatarynan shaǵyn bıznesti qoldaý kórsetkishteri boıynsha óńirler arasynda kósh bastap keledi. Bul týraly oblys ákiminiń orynbasary Nurymbet Saqtaǵanov shaǵyn bıznes ókilderimen kezdesýde aıtty, dep habarlaıdy QazAqparat tilshisi.
Kezdesýge jeńil ónerkásip, servıs, týrızm jáne qaıta óńdeý sııaqty túrli salalar boıynsha belsendi is júrgizip otyrǵan kásipkerler shaqyryldy. Olar birneshe atalym boıynsha oblys ákiminiń alǵys hattary men gramotalaryna ıe boldy.
«Shaǵyn bıznestiń óńir ekonomıkasyndaǵy úlesi jyl saıyn artyp keledi. Bir jyldyń ishinde sizder bıýdjetke 39 mlrd teńgeniń salyǵyn tóledińizder. Jer-jerde ashylǵan jańa bıznes nysandardyń arqasynda 2000-nan astam jańa jumys orny ashyldy. Munyń bir jaǵynda memleket tarapynan kórsetilip otyrǵan qoldaýlardyń áseri de bar. Bizdiń óńir shaǵyn bıznes nysandaryna nesıe berý jáne onyń paıyzdyq mólsherlemesin sýbsıdııalaý kórsetkishteri boıynsha úshinshi jyl qatarynan aldyńǵy orynnan kórinip otyr. Bıyl tek ınnovatsııalyq granttar úshin shaǵyn bızneske oblys bıýdjetinen 150 mln teńge bólindi» - dedi oblys ákiminiń orynbasary.
Eńbegi baǵalanyp, marapatqa ıe bolǵan kásipkerler arasynda múmkindigi shekteýli jandar da boldy. Sonyń biri - Janna Jabekova. Kólik apatynyń kesirinen arbaǵa tańylǵan arý alǵashqy kásibin Kókpekti aýdanynda jumsaq oıynshyqtar tigýden bastaǵan. Onyń qolynan shyqqan oıynshyqtar men toqylǵan sebetter, marjannan órilgen áshekeıler qazir kóptiń suranysyna ıe.
«Kásibimniń órge júzýine «Damý» qorynan alǵan 3 mln teńgelik alǵashqy grant jol ashty. Qazir maǵan irgedegi Reseıden tapsyrystar túsip jatady. Balabaqshalar men qaıyrymdylyq qorlary, alpaýyt kompanııalar da kelisimshartqa otyryp jatyr. Jýyqta «Arselor Mıttal» kompanııasy habarlasyp, áriptestik ornatýǵa nıet tanytty. Munshama tapsyrysty ózim jalǵyz atqara almaıtynym anyq. Memlekettiń qoldaýymen zamanaýı tigin apparattaryn alǵanbyz. Shaǵyn tsehymyz bar. Endi sonda jumys isteıtin qyzdardy izdep júrmin» - deıdi qaısar arý.
Qazaqstannyń 100 jańa esimi atanǵan Janna Jabekova óńirde talpynǵan adamǵa bıznesti dóńgeletip áketý barlyq jaǵdaı jasalǵanyn aıtady.
Oblystyń túkpir-túkpirinen jınalǵan shaǵyn bıznes ókilderi saltanatty shara barysynda bir-birimen jaqyn tanysyp, seriktestik baılanys ornatýǵa múmkindik aldy.
