Shyǵystyń batagóıleri bas qosty

Mundaı shara Óskemende oblystyq ardagerler keńesiniń uıtqy bolýymen tuńǵysh ret ótip otyr. Aýdandar men qalalardyń irikteý saıysynan súrinbeı ótken 22 batagóı qart oblys ortalyǵynda baq synasty.

«Bizdiń oblysta 105 ult, 20 konfessııa ókilderi beıbit ómir súrýde. 14 dostyq úıi, 123 etnomádenı birlestik jumys isteıdi. Prızdenttiń «Rýhanı jańǵyrý» baǵdarlamasyna oraı, qazir biz jeti úlken baǵytta jumys istep jatyrmyz.  Arheologııany damytý, tarıhty, mádenı murany oqytyp, úıretý, halqymyzdyń baı dástúrlerin saqtaý qatarly biregeı baǵdarlamalar qamtylǵan. Munyń ishinde árbir azamatqa úlken jaýapkershilik júkteıtin «Atameken» jobasyn aıryqsha ataı ketý oryndy. Rýhanı jańǵyrý barlyq etnostardyń ulttyq mádenıetteri men tilderin saqtaý, dástúrlerin jańǵyrtýǵa mol múmkindik bergen biregeı halyqtyq joba. Búgingi ótkizip otyrǵan sharamyz sonyń dáleli», - deıdi oblys ákiminiń orynbasary Ásem Núsipova.
 

Baıqaýda baq synaýǵa kelgen saıyskerler quramynda aıtysker aqyndar, aýdanǵa abyroıy asqan aqsaqaldar, sondaı-aq ózge ult ókilderi de boldy. Óskemendik Lıýbov Sergıenko esimdi keıýana kópultty óńirdiń berekesin pash etip, til syndyrǵanyn jurt jyly qabyldady.

Saıys úsh kezeńnen turdy. Alǵashqysynda aqsaqaldar berilgen arnaıy taqyryp boıynsha óner kórsetse, ekinshi aınalymda táýelsiz Qazaqstanǵa bata berdi. Úshinshi kezeńde erkin taqyryptaǵy batalardyń tizgini aǵytyldy.

Saıys qorytyndysy boıynsha 100 myń teńgelik bas báıgeni úsh aınalymda da salıqaly sózimen, mazmundy tilegimen kózge túsken ulandyq Rashıtbek Muhamedjanov enshiledi. Birinshi orynnyń júldesi jarmalyq batagóı Murat Jarmuhamettiń qanjyǵasynda ketse, qos birdeı ekinshi oryndy kókpektilik Shahan Tursynhanov pen semeılik Qaıymhan Beısenbaev bólisti. Júldeli úsh úshinshi oryndy Abaı aýdanynan kelgen Aqanǵalı Maqaev, aıagózdik aqyn Aqash Kóksegenov, tarbaǵataılyq Serik Beksaıynov ıelendi. Júldegerlerge de, qatysýshylarǵa da aqshalaı syılyq berildi.