Shyǵystaǵy shahardyń shyraıyn kirgizetin demalys oryndary kóbeıedi

Esterińizge salaıyq, keler aptada oblys ortalyǵy óziniń 296 jyldyq mereıtoıyn atap ótpek. Osyǵan baılanysty, qazir shaharda kóptegen demalys orny qalpyna keltirilýde, jańa saıabaqtar salynyp, mańyzdy áleýmettik nysandardyń qurylysy aıaqtalýda. Sondaı jańa nysannyń biri ári biregeıi dep «Nurly jol» saıabaǵyn aıtýǵa bolady. Oblystyq drama teatrynyń janynan salynyp jatqan demalys ornynyń jalpy aýmaǵy bes gektardy quramaq. Saıabaqtyń aýmaǵy ádettegideı tórt tekshe emes, romb tárizdes bolady dep josparlanýda. Al nysannyń týra ortalyǵynda bıiktigi 22 metrlik «Nurly jol» monýmenti ornatylmaq. Atalmysh monýment kók baıraǵymyzdyń túsine boıalǵan kolonnalardan, sonymen qatar, shańyraq pen aspanda qalyqtaǵan búrkit músininen quralmaq.

Biregeı demalys ornynyń qurylysyn óz moınyna alǵan merdiger kompanııa almatylyq «Level-S-8» seriktestiginiń dırektory Sársen Seıitovtiń aıtýynsha, qazir saıabaqtyń aýmaǵyn abattandyrý jumystary júrgizilýde. Bolashaqta munda demalys zonalary, balalardyń oıyn alańqaılary men sporttyq alańdar paıda bolyp, LED shamdar ornatylmaq. Buǵan qosa, 500-den astam kóshet otyrǵyzylady dep kútilýde.

Qurylys jumystarynyń barysymen tanysqan oblys ákimi Danıal AHMETOV merdiger kompanııa men quzyrly mekemeler basshylaryna birqatar tapsyrma berdi. Atap aıtqanda, munda otyrǵyzylatyn taldardyń bıiktigi bastapqy jospardaǵydaı bir jarym metr emes, kem degende úsh jarym, áıtpese bes metrdi quraý kerektigin eskertti.

- Keler jyldyń jazynan keshiktirmeı atalmysh saıabaqtyń qurylysyn aıaqtap, qoldanysqa berýimiz kerek. Baıqasańyzdar, sońǵy birneshe jylda qalanyń osy bir aımaǵynda qurylys jumystary kúsheıdi. Bul durys, sebebi, biz Jibek matalar kombınaty yqshamaýdany men Ertistiń oń jaǵalaýy arasyndaǵy bos jatqan jerlerdi tıimdi paıdalanýymyz kerek. Mine, jańadan salynǵan oblystyq teatrdyń irgesinde bolashaqta osyndaı tamasha saıabaq paıda bolady. Al 2017 jyly saıabaq pen teatrdyń qasynan toǵyz qabatty on turǵyn úıdiń qurylysy bastalady. Aınaldyrǵan birneshe jyldyń ishinde bul aımaq adam tanymastaı ózgeredi, - dedi oblys ákimi.

Aımaq basshysynyń aıtýynsha, bolashaqta qaladaǵy burynǵy Komendantka ózeniniń aýmaǵy da aıtarlyqtaı ózgeriske ushyraıtyn bolady. Qurylysshylar bul jerde shetelde óte tanymal dekıng (jerge aǵash taqtaılar salý) ádisin qoldanbaq. Bolashaqta demalys ornynda jańa shamdar ornatylyp, ashyq alańqaılarǵa gazon tóseledi. «Bastaý» atty jasandy sarqyrama men shaǵyn sý qoımalar paıda bolady. Sonymen qatar, «Street workout» tárizdes sporttyq alańqaılar salynyp, trenajerler ornatylmaq.

Bolashaqta qalalyqtardyń taǵy bir súıikti demalys ornyna aınalatyn saıabaqtyń qurylysy eki jyldyń ishinde aıaqtalady dep josparlanyp otyr. Oblys ákimi Danıal AHMETOV Komendantkany kórkeıtý isine jaýapty «Esil-Energoservıs» JShS-niń basshylyǵyna jumystaryna joǵary baǵa bere kelip, nysan ýaqytynan keshiktirilmeı qoldanysqa berilýi kerektigin taǵy bir márte eske saldy.

Qalany aralaý barysynda aımaq basshysy Uly Otan soǵysynda qurban bolǵan sarbazdarǵa arnalǵan Dańq memorıalynyń aınalasynda júrgizilip jatqan qurylys jumystarymen tanysty. Qazir Ertis pen Úlbi ózenderi toǵysqan tusta oryn tepken memorıaldy qalpyna keltirý jumystary qyzý júrgizilýde. Aımaq basshysynyń tapsyrmasy boıynsha munda túsi múldem ózgeshe trotýar tóselip, jaǵalaý qorshaýlary granıt plıtkalarmen qaptalmaq. Sondaı-aq, bıiktigi tórt metrdi quraıtyn shoıyn tireýishter oryn teppek. Bul jumystyń barlyǵy bıylǵy kúzden qalmaı aıaqtalýy tıis.

Aımaq basshysy, sonymen qatar, Borıs Aleksandrov atyndaǵy sport saraıynda bolyp, mundaǵy qurylys jumystarynyń barysyn kórip qaıtty. Búginde sport saraıynyń foıelerin 18,5 metrge úlkeıtý jumystary aıaqtalýǵa jaqyn. Bolashaqta munda saýda núkteleri, demalys oryndary, qosymsha dárethanalar men pandýstar paıda bolady. Merdigerler atalmysh jumystar qyrkúıek aıynyń sońyna deıin aıaqtalatynyna sendirip otyr. Al keler jyldan bastap sport saraıynyń syıymdylyǵyn ulǵaıtý jumystary qolǵa alynady dep kútilýde. Osynyń arqasynda búginde 4 400 orynǵa shaqtalǵan arena bes jarym myń adamdy qabyldaı alatyn bolmaq.

- Óskemen - qazaq hokkeıiniń otany. Munda bul sportty jaqsy kórmeıtin adam kemde-kem. Sport saraıyna «Torpedonyń» oıyndaryna kelgen saıyn arena jankúıerge lyq tolatynyn kórip júrmin. Osy sebepti oblys ortalyǵynda syıymdylyǵy kem degende bes jarym myńdyq hokkeı arenasy bolýy kerek dep túıdim. Mine, aldaǵy birneshe jylda osy baǵyttaǵy jumystar aıaqtalyp, keńeıgen, jańarǵan Sport saraıy jankúıerlerdi qabyldaýǵa daıyn bolady, - dedi oblys ákimi Danıal AHMETOV.

Aımaq basshysy, bul kúni sonymen qatar, Kúlenov kentiniń Moldaǵulova kóshesi boıyndaǵy abattandyrý, kórkeıtý jumystarynyń barysymen tanysty. Qazir munda trotýar tóselip, balalardyń oıyn alańqaılary salynýda. Sondaı-aq, oblys ákimi múmkindigi shekteýli balalarǵa arnalǵan «Aqnıet» mektep-ınternatynyń qurylys jumystarymen tanysty. Atalmysh nysanda keleshekte estý, sóıleý, kórý qabileti nashar júzge jýyq bala emdelip, bilim alatyn bolady. Mektep-ınternat jańa jylǵa deıin paıdalanýǵa berilýi tıis.

Nurjan Kenjeuly