Shyǵysta 83 eldi mekenge sý jaıylý qaýpi bar
ÓSKEMEN. QazAqparat - Shyǵys Qazaqstannyń 83 eldi mekenine sý jaıylý qaýpi bar. Bul týraly «Kóktem-2018» respýblıkalyq jattyǵý jıynynda málim boldy, dep habarlaıdy QazAqparat tilshisi.
Azamattyq qorǵanys qyzmetiniń ókilderi Shyǵys Qazaqstanda bas qosyp, «Kóktem-2018» respýblıkalyq jattyǵý jıyndaryn ótkizýde. Jıynnyń ekinshi kúninde tótenshe jaǵdaı mamandary Óskemen qalasy men Glýbokoe, Zyrıan, Besqaraǵaı aýdandarynda tájirıbe ótkizdi.
Óskemen mańyndaǵy «Ertis-2» saıajaı aýdanynda Ertistiń tasqynynan zardap shekken turǵyndardy «Nıva-Marsh» ushqyr qaıyǵymen qutqarý jattyǵýy uıymdastyrylyp, 13 qyzmettiń selbesip jumys isteýi tekserildi.
Bul ýaqytta temirjol qyzmetiniń mamandary Glýbokoe aýdanynyń Kazıevka stansasynda «relsten shyqqan vagondardy» jolǵa salýmen áýre bolyp jatty. Al poıyzdyń jolyn tosqan tasqyn sý qum tóseý arqyly «aýyzdyqtaldy».
Zyrıan aýdanynyń Zýbovsk aýylynda qutqarýshylar bógetten asqan sýdy «toqtatty». Qar sýy eldiń mazasyn endi «almaýy» úshin damba bıiktetildi.
Shyǵys óńirlik aeroutqyr qutqarý jasaǵynyń jigitteri tikushaq pen rezeńke qaıyqtardyń úılesimdi jumysyn kórsetip, Besqaraǵaı aýdanynyń sý «qursaýynda qalǵan» turǵyndaryn qaýipsiz jerge kóshirdi.
«Bul jattyǵýlarǵa barlyq oblystardan 15 jasaq qatysty. Shyǵysta sý basý qaýpi joǵary 83 eldi meken tirkelip otyr. Búgin sol eldi mekenderge qandaı kómek kórsete alatynymyzdy is júzinde tekserip aldyq. Jergilikti qyzmetter qardyń erý qarqynyn, ózenderdiń muzdan arylýyn udaıy nazarda ustap otyr. Áriptesterimizdiń búgingi birlesken áreketterin «jaqsy» dep baǵalaýǵa bolady» - deıdi Tótenshe jaǵdaılar komıteti tóraǵasynyń orynbasary Marat Kúldikov.
Eki kúndik jattyǵý jıynyna Shyǵys Qazaqstan atynan 100 adam men 33 tehnıka qatysty.
