Shyǵysta 40 gradýs aıaz saqtalady: 8 óńirde eskertý jarııalandy

ASTANA. QazAqparat – «Qazgıdromet» RMK 30 qarashada kún raıynyń buzylýyna baılanysty birneshe óńirde eskertý jarııalady, dep habarlaıdy QazAqparat.

Atap aıtqanda, Almaty oblysynyń Úlken Almaty sý alabynda qar kóshkini júrýi yqtımal. Osy sebepti qar jatqan taý betkeılerine shyǵýdan bas tartý usynylady.

Jetisý oblysynyń soltústiginde, taýly aýdandarynda tuman kútiledi. Soltústik-shyǵystan jel soǵady, ekpini 23-28 m/s jetýi múmkin. Alakól kólderi aýdanynda ońtústik-shyǵystan keı ýaqyttarda 30 m/s jáne odan joǵary jyldamdyqta jel kóteriledi.

Qyzylorda oblysynda jel soltústik-shyǵystan batysqa aýysyp soǵady, kúndiz oblys ortalyǵynda kúshi 15-20 m/s artady.

Kúndiz Aqmola oblysynyń batysynda, ońtústiginde jaıaý burqasyn boljanady. Shyǵystan, ońtústik-shyǵystan jel soǵyp, kúndiz óńirdiń soltústiginde, ońtústiginde ekpini 15-20 m/s kúsheıedi.

Túnde Shyǵys Qazaqstan oblysynyń soltústik-shyǵysynda 40 gradýs qatty aıaz saqtalady.

Túrkistan oblysynyń taýlarynda qatty jaýyn-shashyn (jańbyr, qar) jaýady. Oblystyń batysynda, ońtústiginde, taýly jáne taý bókterli aýdandarynda tuman, kóktaıǵaq bolady. Ońtústik-batystan jel soǵady, taý asýlarynda ekpini 15-20 m/s quraıdy.

Shymkent qalasynda keı ýaqytta tuman, kóktaıǵaq kútiledi.

Táýlik boıy 30 qarashada, túnde 1 jeltoqsanda Jambyl oblysynyń taýly jáne taý bókterli aýdandarynda qatty qar jaýatyny kútiledi. Oblystyń ońtústiginde, soltústiginde, taýly aýdandarynda tuman, kóktaıǵaq bolady. Jeldiń jyldamdyǵy tańerteń jáne kúndiz 30 qarashada, túnde 1 jeltoqsanda 23-28 m/s jetedi.