Shyǵysqazaqstandyqtar Aýyl kúni merekesin atap ótti
ShYǴYS QAZAQSTAN OBLYSY. QazAqparat - Bıylǵy kóktemde Shyǵys Qazaqstan oblysyndaǵy Qaıyńdy aýylynda Aýyl kúnin atap ótý dástúri paıdy boldy. Bul merekeni aýyl jastary oılap taýyp, birneshe aptadan keıin is júzinde júzege asyryldy, dep habarlaıdy «QazAqparat» HAA altaynews.kz-ke silteme jasap.
Aýyldyń qazirgi jáne burynǵy turǵyndary baǵa jetpes týǵan mekenderine qurmet kórsetip, jańa merekeni atap ótý úshin jınaldy. Áýeli qaıtys bolǵan aýyldastardy eske alýǵa arnalǵan as berildi.
Aýyldyń tabıǵaty erekshe ekenin atap ótý kerek. Kúnbatys jaǵynda Buqtyrma sý qoımasy, soltústik jáne ońtústik jaqtarynda tizbektelgen taýlar bolsa, shyǵys jaǵy shabyndyq pen ormandy aǵashtarǵa ulasqan. Onyń ústine eldi mekennen aýdan ortalyǵyna qatynaıtyn jol jaqsy asfalttandyrylǵan, mańynda parom ótkeli de bar.
Merekelik baǵdarlama aıasynda aýyl turǵyndary aýyldyń soltústik shetinde ornalasqan ıppodromdaǵy sporttyq jarystardy tamashalady. Munda eń myqty jastar qol kúresi, gir tasyn kóterý, ıyǵyna tiri qoıdy óńgerip otyryp-turý syndy saıystar arqyly ózara kúsh synasty. Odan keıingi báıge jarysy da aýyl merekesiniń kórigin qyzdyra tústi. Merekelik shara aýdandyq mádenıet úıinen kelgen ártisterdiń kontsertine ulasty.
Aýyldyń baıyrǵy jáne qazirgi turǵyndary bul sharany óz kúshterimen uıymdastyrǵan. Samat Muqanov, Erkin Joldybaev, Almat Boranǵalıev jáne Dáýlet Bekov oılap tapqan shara barlyq jerlesteri arasynda qoldaý tapty. Aýyl kúni kelesi jyly da atalyp ótpek.
