Shyǵysqazaqstandyq ustaz: Muǵalim mártebesi memlekettik qyzmetshimen teńestirilse...

ÓSKEMEN. QazAqparat - Bilim jáne ǵylym mınıstrligi daıyndaǵan «Pedagog mártebesi týraly» Zańnyń jobasyn Shyǵys Qazaqstannyń ustazdar qaýymy qyzý talqylaýda. QazAqparat tilshisine Tarbaǵataı aýdanynyń Tuǵyl aýylyndaǵy orta mektepte aǵylshyn tilinen sabaq beretin jas muǵalim Aıaýjan Ámrenova jańa Zańǵa qatysty óz usynys-pikirlerin aıtyp berdi.

«Elbasymyz N.Á. Nazarbaev bıylǵy Joldaýyndaǵy «Pedagog mártebesi týraly» zań qabyldaý jónindegi tapsyrmasyn pedagogtar qaýymy zor yqylaspen jáne úlken úmitpen qabyl aldy», - deıdi jas maman.

Aıaýjan Ámrenova Bilim jáne ǵylym mınıstrliginiń sol tapsyrmany jedel qolǵa alyp, qujat jobasyn pedagogtardyń talqysyna salǵany óte qýantarlyq jaǵdaı ekenin aıtady.

«Zań jobasynda ustazdarǵa balalaryn balabaqshaǵa kezekten tys ornalastyrý, saýyqtyrý tólemaqylary týraly, eńbek demalysy týraly, pedagog ádebi týraly kóptegen máseleler qamtylǵan. Ony tolyqtaı quptaımyn», - deıdi ustaz.

Zań jobasyn tolyq zerdelep shyqqan jas muǵalim qujatta eskerilmegen birneshe másele boıynsha usynys daıyndapty.

«Birinshiden, jańartylǵan baǵdarlama boıynsha ótkiziletin sabaqqa daıyndalý dástúrli sabaqqa qaraǵanda eki ese kóp ýaqytty talap etedi. Mysaly, jańartylǵan baǵdarlamaǵa sáıkes 1 sabaqqa qysqa merzimdi jospar jasaýdyń ózi keminde 1 saǵat ýaqyt alady. Sondyqtan, júktemeni azaıtyp, mólsherin zańmen bekitýdi usynamyn.

Ekinshiden, memlekettik mekemelerdi qamsyzdandyratyn sııaqty, barlyq mektepterdi qajetti keńse taýarlary men tehnıkasymen qamtamasyz etse. Oǵan qarajat memlekettik bıýdjetten bólinse, sebebi jergilikti bıýdjetke túsetin salmaq kóp.

Úshinshiden, muǵalimderdi memlekettik qyzmetshilerge teńestirip, memlekettik merekeler qarsańynda syıaqy berilse. Qazirgi tańda jan basyna qarjylandyrý júrgiziletin mektepterde ǵana syıaqylar beriledi, degenmen barlyq ustazdardyń jumysy birdeı», - deıdi Aıaýjan Ámrenova.

Tarbaǵataılyq muǵalim Zań jobasynyń 14-babyna tolyqtyrýlar engizý qajet dep oılaıdy.

«Qyzmettik baspana keıinnen satyp alý quqyǵyn bere otyryp jaldamaly páterler arqyly sheshilse degen tilegim bar. Qazir pedagogtar baspanaǵa qol jetkizý úshin qosymsha jumystarǵa shyǵyp, artyq júkteme alýǵa májbúr. Al páter jaldap turatyn bolsa, jaǵdaı tipti qıyn», - deıdi pedagog.