Shyǵysqazaqstandyq shákirtter depýtattyq qyzmetpen tanysty
ASTANA. 7 qarasha. QazAqparat - Shyǵys Qazaqstan oblysy, Aıagóz aýdany, Mádenıet aýylynyń Erkeǵalı Rahmadıev atyndaǵy mektebiniń birneshe oqýshysy Parlament úıine keldi,
dep habarlaıdy Májilistiń baspasóz qyzmeti.
Oqýshylar Qazaqstan Táýelsizdiginiń 20 jyldyq mereıtoıy qarsańynda QR Parlamenti Májilisiniń depýtaty, «Nur Otan» HDP-nyń Saıası keńesiniń Bıýro múshesi Nurtaı Sabılıanovtyń arnaıy shaqyrýymen Astanany kórýge kelgen bolatyn.
Mádenıet aýyly mektebiniń oqýshylary Astana qalasymen tanysyp, aralap kórdi. Ekskýrsııa barysynda Qazaqstannyń Tuńǵysh Prezıdentiniń murajaıyn, «Báıterek» keshenin, «Dýman» oıyn-saýyq ortalyǵyn, Han Shatyrdy, Beıbitshilik jáne kelisim saraıyn, Elordanyń basqa da kórikti jerlerin aralady.
Parlament qabyrǵasynda ótken kezdesýde Májilis depýtaty Nurtaı Sabılıanov Parlamenttiń qurylymy, Májilistiń zań shyǵarý qyzmeti jaıly aıtyp berdi. Depýtatpen kezdesý kezinde oqýshylar Dınara Ábiltaı, Aıshyraq Melis, Aısary Ǵaısına, Janerke Tóken óz oı-pikirlerin aıtty. Shyǵysqazaqstandyq shákirtter Parlamenttiń birlesken otyrys zalyn jáne Májilistiń jalpy otyrys zalyn aralap kórip, fotosýretterge tústi.
