Shyǵysqazaqstandyq órt sóndirýshiler anasy men balasyn ólimnen arashalap qaldy
ÓSKEMEN. QazAqparat - Shúlbi aýylynyń órt sóndirýshileri páteri órtenip, ıis gazynan ýlanyp qala jazdaǵan ana men onyń balasyn aman alyp qaldy, dep habarlaıdy QazAqparat Shyǵys Qazaqstan oblysynyń Tótenshe jaǵdaılar departamentine silteme jasap.
5 qabatty úıdiń turǵyndary eń joǵarǵy qabattan kelip jatqan tútinniń ıisin sezip qalyp, «101» qyzmetine habarlaǵan. 6 mınýttan soń oqıǵa ornyna №47 órt sóndirý qyzmetiniń jeke quramy keledi. Olardyń qatarynda 2 avtotsısternasymen 7 qyzmetker bolǵan.
Órt sóndirý bóliminiń bastyǵy Ersin Bulymbaevtyń aıtýynsha, kórshiler tótenshe jaǵdaılar qyzmetiniń ókilderi kelgenshe esikti buzǵan. Alaıda, onda kirýge qoryqqan.
«Bólmede jalyn bolǵan joq, tek tútin ǵana. Adamdardy kóshirýdiń de qajeti bolǵan joq. Bizdiń bólimshe qyzmetkerleri tútin jaılaǵan bólmege kirip kelip, uıqyda jatqan eki adamdy kóredi. Sosyn biz 57 jasar áıel men 33 jasar er adamdy dalaǵa, taza aýaǵa alyp shyqtyq. Zardap shekkender anasy men balasy eken»,-dep habarlady ol.
Bala birden ózine kelgen, al anasyna kómek kórsetý qajet boldy. Eń jaqyn jedel járdem qyzmeti oqıǵa bolǵan aımaqtan 45 shaqyrym jerde bolǵan. Sol sebepti zardap shekkenderge kómek kórsetý úshin jergilikti ambýlatorııanyń dárigeri keldi. Dáriger zardap shekkenderdi qaraǵan soń, olar ózderine budan ári kómektiń qajet emestigin aıtty.
Bulymbaevtyń sózinshe, páterge kire beris bólmede toqpen jylytatyn pesh, al, onyń janynda kıim ilgish turǵan. Shamasy kıimderdiń biri peshke qulap, tútin sodan shyqqan. Qazirgi tańda bolǵan oqıǵanyń mán-jaıy anyqtalýda.
