Shyǵysqazaqstandyq maman TJM-nyń 2021 jylǵy úzdik dárigeri atandy

ÓSKEMEN. QazAqparat – Shyǵysqazaqstandyq Andreı Zlobın QR Tótenshe jaǵdaılar mınıstrliginiń 2021 jylǵy úzdik dárigeri atandy, dep habarlaıdy QazAqparat tilshisi.

Tótenshe jaǵdaılar mınıstrligi medıtsına qyzmetkerleriniń baıqaýyn uıymdastyrdy. Onlaın formatta ótken baıqaýda komıssııa músheleri qatysýshylarǵa zardap shekkenderge shuǵyl kómek kórsetýge qatysty suraqtar qoıdy. Onyń ishinde «Jábirlenýshiniń shok jaǵdaıynyń alǵashqy belgileri qandaı?», «Gıpoglıkemııa kezinde zardap shekken adamǵa qandaı alǵashqy medıtsınalyq kómek kórsetý kerek?» syndy saýaldar bolǵan.

«Shyǵys Qazaqstan oblysynan baıqaýǵa apattar medıtsınasy ortalyǵy fılıalynyń jan saqtaý jáne anestezıologııa tobynyń jetekshisi Andreı Zlobın, medbıke Nazıgúl Jadyqbaeva jáne Óskemen qalasynyń mamandandyrylǵan «ÓsjAQJQ» jasaǵynyń dárigeri Erjanbek Saılanbek qatysty. Baıqaý qorytyndysy boıynsha QR TJM 2021 jyldyń úzdik dárigeri bolyp Andreı Zlobın tanyldy», - delingen ShQO Tótenshe jaǵdaılar departamentiniń baspasóz qyzmeti taratqan málimette.

Andreı medıtsına salasynda 10 jyldan astam ýaqyt boıy ter tógip keledi. Al sońǵy 3 jyl apattar medıtsınasy ortalyǵynda jumys isteıdi.