Shyǵys Qazaqstannyń 5 aýdanynda sý tasqynyna tosqaýyl qoıylyp jatyr
ÓSKEMEN. QazAqparat – Shyǵys Qazaqstan oblysyndaǵy bes aýdanda sý tasqynyna tosqaýyl qoıý jumystary júrgizilip jatyr. Osy maqsatta 10-nan astam is-shara josparlanǵan, dep habarlaıdy QazAqparat tilshisi.
«Sý tasqynyna qarsy 13 is-shara Tarbaǵataı, Besqaraǵaı, Aıagóz, Katonqaraǵaı jáne Altaı aýdandarynda júrgizilip jatyr. Sonyń nátıjesinde, 471 turǵyn úıdi sý basýdyń aldyn alýǵa múmkindik jasalady. Shyǵys Qazaqstanda 229 gıdrotehnıkalyq qurylys bar. Byltyr tótenshe jaǵdaılardy boldyrmaý maqsatynda «Shyǵys sý qoımalary» MKM 7 gıdrotehnıkalyq qurylysqa qalpyna keltirý jumystaryn júrgizdi», - deıdi oblystyq Tabıǵı resýrstar jáne tabıǵat paıdalanýdy retteý basqarmasy basshysynyń orynbasary Elaman Muhtarhanov.
Oblys ákimdiginiń qaýlysymen «Laıly» sý qoımasyn qalpyna keltirý maqsatynda 38,4 mln teńge qarajat bólingen. Qazirgi ýaqytta jumystar tolyq kólemde aıaqtaldy.
«Tótenshe jaǵdaı týyndaǵan jaǵdaıda gıdrotehnıkalyq qurylystarda táýlik boıy kezekshilik uıymdastyrylady. Jumys kestesi ázirlenip, bekitildi. Soǵan sáıkes is-sharalardy iske asyrý 2022 jyldyń qazan aıynyń sońyna deıin aıaqtalady», - deıdi Elaman Muhtarhanov.
Esterińizge sala ketsek, osyǵan deıin Shyǵys Qazaqstandaǵy 3 aýdanda jaıylymdyq jer tapshy ekendigi habarlanǵan.
