Shyǵys Qazaqstannyń 2 aýdanynda tasqyn qaýpi joǵary
NUR-SULTAN. QazAqparat – Shyǵys Qazaqstan oblysynyń Kókpekti jáne Altaı aýdandarynda tasqyn qaýpi joǵary, dep habarlaıdy QazAqparat tilshisi.
Tótenshe jaǵdaılar mınıstrliginiń tótenshe jaǵdaılardyń aldyn alý departamentiniń bastyǵy Rýstambek Ámrın tasqyn qaýpi seıilmegen 171 eldi mekenniń ishinde qaı aýyldarda qater kóbirek ekenin málim etti.
«Naýryz aıynyń aıaǵynda Shyǵys Qazaqstan oblysynda áýeden baqylaý júrigizip, Kókpekti, Altaı aýdandaryn zerttep qaıttyq. 27 naýryzda Tótenshe jaǵdaı mınıstrliginiń bólimsheleri alǵashqy sappen sondaǵy birneshe eldi mekenge jetti. Ásirese, Altaı aýdanynyń Maleev, Zýbov kentterinde, Kókpekti aýdanynyń Samar aýylynda shynymen de tasqyn qaýpi joǵary. Bul eldi mekenderdiń bári bizdiń baqylaýymyzda», - dedi vodemstvo ókili.
Ortalyq kommýnıkatsııalar qyzmetinde brıfıng barysynda BAQ ókilderi Aqmola oblysyndaǵy Qarajar aýylynyń turǵyndaryna shaǵym túsip jatqany týraly saýal qoıdy.
«Qarajar aýylyna keler bolsaq, Aqmola oblysy boıynsha tasqynǵa qarsy jedel top qurylǵan. Ótinim túsken jaǵdaıda osy top kúsh jumyldyrady. Jalpy Aqmola oblysy boıynsha Tótenshe jaǵdaı qyzmetiniń 775 adamy men 143 tehnıkasy bólingen. Onyń ishinde qaıyqtar men sý sorǵysh tehnıka bar. Qońyraý túsken boıda jedel áreket etýge daıyn. Bul iste Aqmola oblysy men Nur-Sultan qalasy ózara birlesip áreket etýge kelisip otyr», - dedi mınıstrlik ókili.
Eske salsaq, Tótenshe jaǵdaı mınıstrliginiń málimeti boıynsha, elimizdegi 171 eldi mekendi sý basý qaýpi seıilmegen.
Al Ekologııa, geologııa jáne tabıǵı resýrstar mınıstriniń orynbasary Serik Qojanııazov jergilikti qyzmetter eldi mekenge jýyq qoımalardan bosatylǵan sýdyń arnalaryn arshý jumystaryna muqııat qaraý kerektigin eskertip otyr.
