Shyǵys Qazaqstannan Qytaıǵa bal, balyq jáne et eksporttalmaq
ÓSKEMEN. QazAqparat - Shyǵys Qazaqstannan Qytaıǵa bal, balyq jáne et ónimderin eksporttaý máselesi talqylandy, dep habarlaıdy QazAqparat tilshisi.
Qytaıdyń karantındik qyzmet ókilderi men Qazaqstannyń veterınarlyq baqylaý jáne qadaǵalaý komıtetiniń ókilderi Óskemende bas qosyp, «Nurly jol» baǵdarlamasy aıasynda Jibek jolyn qaıta jańǵyrtý máselelerin talqylady.
«Birlesken jumystardyń nátıjesi sizderdiń Memleket basshylaryńyzdyń bizdegi «Nurly jol» baǵdarlamasy arqyly Jibek jolyn qaıta jańǵyrtý týraly usynysyn iske asyrýǵa kómektesedi dep úmittenemiz. Bul oblys Qazaqstandayǵ baldyń 75 paıyzyn óndirip otyr. Sondyqtan, ekijaqty qarym-qatynasty osy óńirden bastap otyrmyz», - dedi Veterınarlyq baqylaý jáne qadaǵalaý komıteti tóraǵasynyń orynbasary Oljas Asaýbaev.
Qytaı tarapy munda QHR eksporttaýshylary tizbesine enýi tıis shyǵysqazaqstandyq kásiporyndardyń jumysymen tanysý úshin kelgenin atady.
«Bizge mundaǵy tehnıkalyq talaptardyń qalaı oryndalatynyn, sanıtarlyq normalardyń jaı-kúıin bilý mańyzdy. Ónimniń qaýipsizdigin qadaǵalaý júıesi jaıynda tereńirek bilgimiz keledi. Bal ónimderin sertıfıkattaý úshin óndirýshiler qandaı úderisterden ótetinin, ónim sapasy qandaı krıterııler boıynsha anyqtalatynyn túsinýimiz qajet», - dedi delegatsııa músheleri.
Qytaı tarapy Shyǵys Qazaqstannyń 10 kásipornyna óz elderinde ónim satýǵa múmkindik berýge nıetti. Onyń altaýy bal, úsheýi balyq, bireýi et ónimderin shyǵaratyn kásiporyn bolýy tıis. Sheteldik delegatsııa men Komıtet ókilderi «Paseka» sharýa qojalyǵy men «Tóre Toǵam» JShS-niń bazasynda bolyp, bal jáne balyq ónimderiniń óndirisimen tanysty.
