Shyǵys Qazaqstannan 29 medıtsına qyzmetkeri Izraıl men Germanııada oqýda

ÓSKEMEN. QazAqparat – Shyǵys Qazaqstan oblysynda búginde 16 myńnan astam medıtsına qyzmetkeri eńbek etip júr. Bıyl óńirdegi medıtsına salasyn damytýǵa 38 mlrd teńgeden astam qarajat bólindi, dep habarlaıdy QazAqparat tilshisi.

«Shyǵys Qazaqstanda kásibı, óz isine shynaıy berilgen dárigerlerdiń, orta jáne kishi personaldyń úlken jáne uıymshyl ujymy jumys isteıdi. Búgingi mereke – aq halattylarǵa degen qurmet, óıtkeni olar bizdiń densaýlyǵymyz ben ómirimizdi qorǵaıdy. Biz ShQO-da densaýlyq saqtaý salasyn damytý úshin kóp jumys atqaramyz. Jańa biregeı medıtsınalyq ortalyqtar men bólimsheler ashyp, jańa jabdyqtar satyp alyp, dárigerler men medbıkelerdiń biliktiligin arttyramyz. Munyń bári patsıentterge joǵary tehnologııalyq medıtsınalyq kómekke qol jetkizýge múmkindik beredi. 2020-2021 jyldary dárigerlerimiz koronavırýspen kúreste aldyńǵy qatarda bolyp, keıde ózderin aıamaı, adamdarǵa medıtsınalyq qana emes, psıhologııalyq kómek pen qoldaý kórsetti. Sizderdiń árqaısyńyzdyń eńbekterińizdi erekshe baǵalaımyz», - dedi aımaq basshysy Danıal Ahmetov saltanatty jıynda.

Búginde óńirde 700 medıtsınalyq nysan bar. Oblystyń memlekettik densaýlyq saqtaý júıesinde 16 370 medıtsına qyzmetkeri jumys isteıdi. Onyń ishinde 4 434 dáriger jáne 11 936 orta medıtsına qyzmetkeri.

Oblystyq densaýlyq saqtaý basqarmasynyń málimetinshe, bıyl medıtsına kadrlaryn oqytý jáne biliktiligin arttyrý baǵdarlamasyn iske asyrýǵa oblystyq bıýdjetten onkogematologııa, gematologııa, kardıologııa, akýsherııa jáne gınekologııa sııaqty basym baǵyttar boıynsha 840,2 mln teńge jumyldyrylǵan. Naýryz aıynan bastap Izraıldiń, Germanııanyń jetekshi klınıkalarynda 29 medıtsına qyzmetkerin oqytý bastaldy.