Shyǵys Qazaqstanǵa koronavırýsqa qarsy vaktsınanyń 1300 dozasy jetkizildi

Óskemende alǵashqy ekpeni ShQO Sanıtarııalyq-epıdemıologııalyq baqylaý departamentiniń ókili Qanat Turdıev pen «Ana men bala ortalyǵy» ShJQ KMK bas dárigeri Ermek Omarbekov, Semeıde ShQO Densaýlyq saqtaý basqarmasy basshysynyń orynbasary Dýman Berikuly jáne «Oblystyq perınataldyq ortalyǵy» ShJQ KMK bas dárigeri Arqat Daıyrbekov aldy.

«Pandemııa búkil álemge aıtarlyqtaı ózgeris ákeldi. Burynǵydaı qalypty ómirge oralǵymyz kelse, bir-birimizge qonaqqa, kınoteatrlarǵa, teatrlarǵa barǵymyz kelse, týystarymyzben kedergisiz kórisýdi qalasaq, basty 2 shartty oryndaýymyz kerek. Ol vaktsına alý jáne QR Bas memlekettik sanıtarııalyq dárigeriniń barlyq nusqamalaryn oryndaý. Sonda ǵana indetti jeńe alamyz. Biz birgemiz! Bul pandemııany birlese jeńemiz» - dedi Ermek Omarbekov.

Búginde ShQO-ǵa 1300 doza vaktsına jetkizildi. Alǵashqy vaktsınany Óskemen jáne Semeı qalalarynyń emhanalary alady.

Oblystyń Densaýlyq saqtaý basqarmasynyń málimeti boıynsha, aqpan aıynyń basynda vaktsınalardy tasymaldaý jáne saqtaý úshin medıtsınalyq uıymdarǵa qosymsha 16 bıomedıtsınalyq muzdatqysh pen kóp ret qoldanylatyn termotirkegishteri bar 60 termokonteıner satyp alynady.

Vaktsına salýǵa tek qarsy kórsetilimderi joq adamdar jiberiledi. Ekpe alar aldynda dárigerdiń mindetti tekserisi júrgiziledi. Sondaı-aq vaktsınatsııa kezeńinde monıtorıng jáne ádistemelik kómek kórsetýdi uıymdastyrý úshin jumys komıssııasy qurylǵan.

Aıta keteıik, búgin Qazaqstanda koronavırýs ınfektsııasyn juqtyrý jáne taratý táýekeli joǵary sanattardy koronavırýsqa qarsy vaktsınalaý bastaldy. Qazaqstanda vaktsına erikti túrde salynady.

Elordadaǵy №6 qalalyq emhanada QR Densaýlyq saqtaý vıtse-mınıstri – Bas memlekettik sanıtar dáriger Erlan Qııasov pen Densaýlyq saqtaý vıtse-mınıstri Ajar Ǵınııat koronavırýsqa qarsy vaktsına saldyrdy. Qazaqstannyń bas sanıtary vaktsına alǵannan keıingi hal-jaǵdaıyn aıtty.