Shyǵys Qazaqstandaǵy jol-kólik oqıǵasy: Bir adam qaza taýyp, úsheýi jaralandy
ShYǴYS QAZAQSTAN. QazAqparat – Shyǵys Qazaqstan oblysynda jol-kólik oqıǵasy bolyp, bir adam qaza tapty, dep habarlaıdy QazAqparat ShQO polıtsııa departamentiniń baspasóz qyzmetine silteme jasap.
Jol apaty Glýbokoe aýdanynda «Óskemen – Rıdder» tasjolynyń 65-shaqyrymynda, Zımove aýylynan 500 metr jerde bolǵan.
«28 jastaǵy «Toyota Carina» júrgizýshisi Óskemenge bara jatqan. Róldi ıgere almaı qalǵan azamat qarsy jolǵa shyǵyp, 67 jastaǵy azamat júrgizip kele jatqan «Subaru Forester» kóligine soǵysqan», - dep túsindirdi ShQO PD baspasóz qyzmeti.
Apat saldarynan «Toyota Carina» kóliginiń 37 jastaǵy jolaýshysy oqıǵa ornynda mert boldy. Úsh jolaýshy, onyń ekeýi kámelet jasyna tolmaǵan balalar ártúrli dene jaraqatymen medıtsınalyq mekemege jetkizildi.
Tártip saqshylary QR QK 345-bap, 3-tarmaǵy boıynsha sotqa deıingi tergeý jumystaryn bastady. Qajetti saraptama jumystary jasalyp jatyr.
