Shyǵys Qazaqstandaǵy tikushaq apatyna baılanysty arnaıy tergeý komıssııasy quryldy
ASTANA. QazAqparat - Shyǵys Qazaqstan oblysynda bolǵan tikushaq apatyna baılanysty mınıstrlik deńgeıinde arnaıy tergeý komıssııasy quryldy.
Erteń, aqpannyń 27-si kúni atalǵan komıssııa oqıǵa ornyna attanady. Bul týraly QazAqparat tilshisine QR Investıtsııalar jáne damý mınıstrliginiń baspasóz qyzmeti habarlady.
Aıta keteıik, keshe jeke adamǵa tıesili S-341 tikushaǵynyń ushqyshy baılanysqa shyqpaı qaldy. Ony izdeýge búgin tańerteń oblys ortalyǵynan bortynda qutqarýshylar toby jáne ShQO TJD basshysynyń orynbasary bar MI-8, Semeı qalasynan MI-17 áskerı tikushaǵy ushyp shyqqan bolatyn. ShQO TJD daǵdarys ortalyǵynda jáne Aıagóz aýdanynda jedel shtab quryldy. Іzdestirý jumystaryna ShQO TJD jeke quramynan jáne aýdandyq ІІB 29 adam men 4 tehnıka jumyldyryldy. Jergilikti atqarý organynan 10 adam jáne 5 tehnıka shyqty.
Apat bolǵan jerdi búgin Almaty oblysynan izdeýge attandyrylǵan jeke kompanııanyń MI-2 tikushaǵyn tapty. «Qazaeronavıgatsııanyń» málimetinshe, joǵalǵan tikushaq Aıagóz qalasynan soltústik batysqa qaraı 60 km jerden tabyldy. Olardyń habarlaýynsha, ushqysh qaza tapqan. Bir jolaýshy aman qalǵan, ony Aıǵyz aýylyna jetkizdi. Al borttaǵy úshinshi adam týraly aqparat naqtylanýda.
