Shyǵys Qazaqstandaǵy tasjoldardyń biri 30 qyrkúıekke deıin jabyldy
ÓSKEMEN. QazAqparat – Shyǵys Qazaqstan oblysyndaǵy tasjoldardyń biri 30 qyrkúıekke deıin jabyldy, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetine súıensek, «Óskemen-Taýly Úlbi-Soltústik» tasjolynyń 37 shaqyrymynda sý qubyryn aýystyrý jumystary júrgizilmek.
Soǵan baılanysty 28-30 qyrkúıek aralyǵynda atalǵan tasjoldyń 31-den 37 shaqyrymyna deıingi ýchaske barlyq kólik quraldary úshin jabyq bolady. Kólik júrgizýshileri eldi mekenderge, lagerlerge jáne demalys bazalaryna «Óskemen-Altaı-Rahman qaınary» tasjoly arqyly bara alady.
«Osy rette, óńir jurtshylyǵyna júrer joldy aldyn ala josparlap, engizilgen tyıymdarǵa túsinistikpen qaraýdy suraımyz», - dep habarlady vedomstvo ókilderi.
