Shyǵys Qazaqstandaǵy sý tasqynynan bıýdjetke qansha shyǵyn keldi
ASTANA. QazAqparat - Tótenshe jaǵdaılar komıtetiniń tóraǵasy, general-maıor Vladımır Bekker Shyǵys Qazaqstan oblysyndaǵy sý tasqynymen kúreske bıýdjetten jumsalǵan qarajat kólemin atady, dep habarlaıdy QazAqparat tilshisi.
«Premer (QR Premer-Mınıstri Baqytjan Saǵyntaev - red.) Shyǵys Qazaqstan oblysyndaǵy jumystar úshin 2 mlrd teńgeden astam qarajat bólýdi tapsyrdy. Aıagóz qalasy boıynsha da naqty tsıfrlar jarııalandy. Sý tasqynynan úıleri jaramsyz bolyp qalǵandar úshin baspana satyp alýǵa shamamen 50 mıllıon teńge, túrli kómek kórsetý úshin - shamamen 70 mıllıon teńge jumsaldy», - dedi V. Bekker QR ІІM Tótenshe jaǵdaılar komıtetinde ótken eldegi sý tasqyny jaǵdaıy týraly brıfıngte.
Sonymen birge, TJ komıtetiniń tóraǵasy respýblıkadaǵy qutqarýshylardy qosymsha qural-jabdyqtarmen jasaqtaý úshin satyp alýlar júrgizý qajettigin málimdedi.
«Eldegi azamattyq qutqarý bólimsheleri tehnıka túrlerimen óte az qamtylǵan. Qazirgi ýaqytta arnaıy quraldar satyp alý úshin Úkimet rezervinen 4,3 mlrd teńge kóleminde qarajat bólý máselesi qarastyrylyp jatyr», - dedi ol.
Onyń aıtýynsha, qutqarýshylardy qosymsha jasaqtaý boıynsha arnaıy jospar jasalmaq.
«Premer-Mınıstrdiń birinshi orynbasarynyń tóraǵalyǵymen vıdeoselektorlyq rejimde jınalys ótti. Onda Іshki ister mınıstrligine jergilikti organdarmen birlesip, 2018-2020 jyldarǵa arnalǵan kezeń-kezeńimen materıaldyq-tehnıkalyq jasaqtaýdyń jospar-kartasyn jasaý tapsyryldy», - dep atap ótti Bekker.
