Shyǵys Qazaqstandaǵy iri kásiporyndar jumysyn jalǵastyrýda
ShQO kásipkerler palatasy dırektorynyń orynbasary Qaırat Mamyrbaevtyń aıtýynsha, TJ jarııalanǵan birinshi kúnnen bastap jeke kásipkerlerge elimizde daǵdarystyń aldyn alý jumystarynyń qalaı júrgizilip jatqany túsindirilýde. Búginde birqatar sharalar qabyldanyp, sonyń aıasynda týrızm, qonaqúı qyzmeti men qoǵamdyq tamaqtaný oryndarynyń ıeleri salyqtan bosatylǵan. 1 maýsymnan bastap shaǵyn jáne orta bıznes ókilderi salyq tólemeıtin bolady. Sondaı-aq barlyq bıznes sýbektileri úsh aı boıy nesıeni tóleýdi keıingi shegere alady. Óńirdegi kásiporyndardyń kóbisi jumysyn toqtatpady. Olar qyzmetkerleriniń biraz bóligin qashyqtan jumys isteýge kóshirgen.
«Sılýmın-Vostok» JShS tótenshe jaǵdaıǵa baılanysty birde-bir qyzmetkerdi aqysyz eńbek demalysyna jibermegen jáne eshkimdi jumystan bosatpaǵan.
«Kásiporynda koronavırýs ınfektsııasynyń aldyn alý maqsatynda sanıtarlyq baqylaý kúsheıtildi. Kompanııa 100 paıyz qajetti quraldarmen jabdyqtalǵan. Biz mashına qurastyrý jumysyn toqtata almaımyz. Óıtkeni osy kásiporynda shyǵarylatyn tehnıka kommýnaldyq qyzmet úshin aýadaı qajet, - deıdi «Sılýmın-Vostok» JShS dırektory Zoıa Novolodskaıa.
Óndiristik qýatty azaıtqan kásiporyndar da bar. Solardyń biri - «ÝK Trıpleks». Atalmysh kompanııa shyny shyǵarýymen aınalysady. Búginde bul kásiporyn qyzmetkerleriniń 30 paıyzy ǵana jumys isteýde. Qalǵan 70 paıyzy aqyly eńbek demalysyna jiberilgen.
«Elimizde jarııalanǵan tótenshe jaǵdaıǵa baılanysty kásiporyn qyzmetkerleri qysqartylǵan rejımde júmys isteýge kóshti. Jumysshylardyń deni aqyly eńbek demalysyna shyqty. Al qalǵandary qyzmettik kólikpen jumysqa jetkizilýde. Osyndaı qıyn kezeńde bizge kómek kórsetip, nesıeniń tóleý merzimin 90 kúnge deıin shegergeni úshin Úkimetke alǵys aıtamyn. Karantın aıaqtalǵan soń bizdiń kásiporyn tolyq kúsh-qýatpen jumysqa kirisedi, - deıdi «ÝK Trıpleks» JShS dırektory Konstantın Borodastov.
