Shyǵys Qazaqstandaǵy gaz stansasynda bolǵan jarylystyń aldyn ala sebebi aıtyldy

ÓSKEMEN. QazAqparat – Shyǵys Qazaqstan oblysyndaǵy gaz stansasynda bolǵan jarylystyń aldyn ala sebebi aıtyldy, dep habarlaıdy QazAqparat tilshisi.

Eske sala keteıik, 22 maýsymda Shemonaıha qalasynda gaz quıý stansasynda bolǵan jarylystan tórt adamdy kúıik shalǵan edi.

Birinshi eki er adam, sodan keıin taǵy bir azamat pen áıel aýrýhanaǵa jatqyzyldy. 26 maýsymda denesin 100 paıyz derlik kúıik shalǵan eki adamnyń kóz jumǵany habarlandy.

Shemonaıha aýdany ákiminiń orynbasary Alekseı Ahaevtyń aıtýynsha, jarylystyń aldyn ala sebebi belgili boldy.

«Qazirgi ýaqytta oqys oqıǵaǵa baılanysty tekserý júrgizilip jatyr. Jarylys bolýyna - qaýipsizdik tehnıkasynyń buzylýy sebep bolýy múmkin. Ázirge bul negizgi nusqa retinde qarastyrylýda. Alaıda naqty sheshim tek tekserý jumystary aıaqtalǵannan keıin shyǵady», - deıdi ol.