Shyǵys Qazaqstandaǵy alapat órt sóndirildi
ÓSKEMEN. QazAqparat - Shyǵys Qazaqstan oblysy Abaı aýdanyndaǵy 3500 gektar aýmaqty qamtyǵan alapat órt sóndirildi, dep habarlaıdy QazAqparat Tótenshe jaǵdaılar komıtetiniń baspasóz qyzmetine silteme jasap.
Bul jóninde Tótenshe jaǵdaılar komıtetiniń resmı ókili Nursultan Nurahmetov málim etti. Onyń aıtýynsha, tilsiz jaý búgin saǵat 16:13-te tolyq sóndirilgen.
Eske sala keteıik, 24 qyrkúıek kúni bastalǵan órt Abaı aýdanyndaǵy taýly, jartasty, adam júre almaıtyn jerdegi shóp alqaptaryn sharpyǵan bolatyn. Órt aýmaǵy – shamamen 3500 gektar. Eldi mekenderge qaýip tóngen joq.
Tilsiz jaýdy aýyzdyqtaýǵa oblystyq TJD, Ulttyq ulan áskerı bólimi men jergilikti atqarýshy organdardyń kúsh-quraldary jumyldyrylǵan. Oqıǵa ornynda barlyǵy 242 adam jáne 29 tehnıka jumys istedi.
