Shyǵys Qazaqstandaǵy 9 ýchaskede laı kóshkini júrý qaýpi bar
ÓSKEMEN. QazAqparat – Shyǵys Qazaqstan oblysyndaǵy 9 ýchaskede laı kóshkini júrý qaýpi bar, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, «Qazseldenqorǵaý» oblystyq fılıalynyń mamandary sel qaýpi bar ýchaskelerge monıtorıng júrgizýdi jalǵastyrýda. Jaqynda Rıdder qalasynyń Belaıa Ýba ózeni basseıniniń joǵarǵy saǵasyndaǵy kólderge batımetrııalyq zertteý júrgizildi.
«Muzdyq kólderdiń kólemi men tereńdigi ólshendi. Nátıjesinde mamandar qazirgi ýaqytta kólder qaýip tóndirmeıdi degen qorytyndyǵa keldi. Atalǵan ýchaskede 12 kól bar. Onyń ishinde eldi mekenderge jaqyn ornalasqan úsheýi zertteldi. Bul muzdyq kólder teńiz deńgeıinen 2000 metr bıiktikte ornalasqan», - delingen aqparatta.
Muzdyq kól qabyrǵasynyń jarylýy joıqyn sel tasqynyna ákelip soǵýy múmkin. Qazirgi ýaqytta selge qarsy aldyn alý is-sharalaryn júrgizýdiń qajettiligi týyndap otyrǵan joq. Shyǵys Qazaqstan oblysynyń taýlarynda jyl saıyn barlyǵy 13 eldi mekenge qaýip tóndiretin 144 muzdyq kól paıda bolady.
«Kólderdiń basym bóligi Zaısan, Katonqaraǵaı, Altaı jáne Rıdder aýdandarynda. Búgingi kúni óńir boıynsha jaǵdaı turaqty. Sel qaýpi bar kezeń qyrkúıektiń alǵashqy kúnderinde aıaqtalady», - dep atap ótti «Qazseldenqorǵaý» ShQOF basshysy Omar Dúzgimbaev.
Sel qaýpi bar kezeń bastalǵaly beri barlyǵy 216 ret jerústi tekserý júrgizilgen. Oblystaǵy 9 ýchaskede laı kóshkini júrý qaýpi bar. Bul negizinen tasjoldarda, ózen basseınderinde ornalasqan ýchaskeler.
Sel jáne laı kóshkini júrý qaýpi bar ýchaskelerde 44 eskertý jáne tyıym salý belgileri ornatyldy. Jergilikti atqarýshy organdarǵa, kásiporyn basshylaryna jáne úıleri qaýipti ýchaskelerde ornalasqan azamattarǵa 101 usynym-habarlama jiberilgen.
