Shyǵys Qazaqstandaǵy 9 aýyl gazsyz qaldy
ÓSKEMEN. QazAqparat – Shyǵys Qazaqstan oblysy Zaısan aýdanyndaǵy 9 aýyl gazsyz qaldy, dep habarlaıdy QazAqparat tilshisi.
Qazirgi ýaqytta Zaısan aýdanyndaǵy 9 eldi meken gazsyz qaldy. Belgili bolǵandaı, buǵan 1 qarasha kúni saǵat 12.00-de aýyldardy gazben qamtamasyz etetin joǵary qysymdy magıstraldyq qubyrdan gaz shyǵýy sebep bolyp otyr. Osyǵan oraı shuǵyl túrde aýdan ákimi Dýlat Qajanov basqaratyn arnaıy shtab qurylǵan.
«Barlyǵy 9 eldi mekenge gaz berý toqtatyldy. Qalpyna keltirý jumystary júrgizilýde. Tıisti materıaldar, mamandar sany jetkilikti. Avarııa bolǵan jerde arnaıy shtab músheleri jumys isteýde», - dep habarlady Zaısan aýdanynyń ákimdiginen.
Aýyldyq okrýg ákimderi gazsyz qalǵan eldi meken turǵyndaryna óz úı̆lerin qatty otynmen jáne elektr qýatymen jylytýǵa aýystyrý qajettigi týraly túsindirý jumystaryn júrgizýde.
«Ár eldi mekenge ákimdiktiń jaýapty adamdary bekitilgen. Barlyq jaǵdaı̆ erekshe baqylaýda», - delingen aqparatta.
