Shyǵys Qazaqstandaǵy 3 aýdanda órt qaýpiniń eń joǵary deńgeıi saqtalýda
ShQO tótenshe jaǵdaılar departamenti baspasóz qyzmetiniń málimetine súıensek, bıyl óńir boıynsha jalpy aýdany 452,8 gektardy quraıtyn 50 orman órti tirkeldi. Sondaı-aq 36 ret ashyq alańda shóp janǵan.
«Oblysta órttiń aldyn alý maqsatynda ormanshylar, TJD, polıtsııa jáne jergilikti atqarýshy organ qyzmetkerleriniń 272 adamy quraıtyn 46 mobıldi top jumys isteýde. Ýaqytyly profılaktıkalyq jumystardyń arqasynda órt qaýipsizdigi erejelerin buzǵany úshin 55 adam ákimshilik jaýapkershilikke tartylǵan», - delingen aqparatta.
Qazirgi ýaqytta Shyǵys Qazaqstanda órt qaýiptiliginiń eń joǵary 5-shi deńgeıi Katonqaraǵaı, Samar jáne Kúrshim aýdandarynda saqtalýda.
Óńir aýmaǵynda ShQO ákiminiń «órt qaýpi joǵary kezeńde memlekettik orman qory aýmaǵynda jeke tulǵalardyń bolýyna tyıym salý týraly» qaýlysy kúshin engen.