Shyǵys Qazaqstandaǵy 17 aýylǵa mal qorymy salynbaq
Búgin oblystyq máslıhattyń kezekti tórtinshi sessııasy barysynda óńir depýtattary ótken jylǵy óńir bıýdjetiniń atqarylýy týraly esepti bekitti. Sondaı-aq 2021-2023 jyldarǵa arnalǵan bıýdjetke ózgerister engizý týraly sheshim qabyldandy.
Sessııada baıandama jasaǵan ShQO qarjy basqarmasynyń basshysy Dýman Rahmetqalıev aımaqta turaqty ekonomıkalyq ósimniń oń qarqyny saqtalǵanyn, áleýmettik sala mekemelerin qarjylandyrý, áleýmettik mańyzdy nysandardy salý jáne kúrdeli jóndeý jumystary basym baǵyt bolyp qala beretinin atap ótti.
«Ótken jyly aýyl sharýashylyǵy salasyndaǵy jalpy ónim kólemi 686,3 mlrd teńgeni quraǵan. Qurylys jumystaryna 359,2 mlrd teńge jumsaldy. Byltyr jumyssyzdyq deńgeıi 4,9%-dy qurady», - dedi ol.
ShQO ekonomıka jáne bıýdjettik josparlaý basqarmasynyń basshysy Sáýle Ulaqovanyń aıtýynsha, qarajatty qaıta bólý Kýrchatov qalasyndaǵy qazandyqty jóndeýge, Tarbaǵataı aýdanynyń Aqsýat jáne Aqjar aýyldaryndaǵy shaǵyn fýtbol jáne strıt-ýorkaýt alańdary qurylysyna qarastyrylǵan. Ulan aýdanyndaǵy balabaqshanyń jylý jelilerin jáne R.Mársekov atyndaǵy orta mektep ǵımaratyn jóndeýge de aqsha bólinedi.
«Budan bólek, eki eldi mekende, atap aıtqanda Glýbokoe aýdanynyń Beloýsovka jáne Tarbaǵataı aýdanynyń Tuǵyl aýylyn «Shyǵys - adaldyq alańy« jobasy aıasynda «Ashyq ákimdik« formatynda halyqqa qyzmet kórsetýdiń servıstik modeline kóshirý maqsatynda qosymsha qarajat jumyldyrylady. Qazirgi ýaqytta 17 aýylda mal qorymyn salýǵa JSQ ázirlenýde, olarǵa da qarajat bólinedi», - dedi ol.
