Shyǵys Qazaqstanda jylytý beketteri jumysyn bastady
ÓSKEMEN. QazAqparat – Shyǵys Qazaqstan oblysynyń tasjoldarynda jylytý beketteri jumysyn bastady, dep habarlaıdy QazAqparat tilshisi.
Oblystyq TJD baspasóz qyzmetiniń málimetine súıensek, 4 medıtsınalyq-qutqarý jáne 19 jylytý beketi joldyń boıyndaǵy qaýip kútiletin tustarda jumys isteıdi. Medıtsınalyq-qutqarý beketteri jol-kólik oqıǵasy kezinde zardap shekkenderge jedel medıtsınalyq kómek kórsetýge baǵyttalǵan. Onda táýlik boıy 5 maman jumys isteıdi: dáriger, feldsher, dıspetcher, qutqarýshy jáne júrgizýshi.
Jolda qandaı da bir qıyndyqqa tap bolǵan azamattar da beketke kelip kómek suraı alady. 2019-2020 jyldardaǵy qysta 16 adamǵa medıtsınalyq kómek kórsetilip, 27 adam evakýatsııalanǵan.
Medıtsınalyq-qutqarý beketteri kelesi jerlerde ornalasqan:
1) Prıvolnoe beketi – «Óskemen - Semeı» tasjolynyń 85 shaqyrymyndaǵy Ulan aýdany, Prıvolnoe aýylynyń janynda;
2) «Jarma» beketi – «Almaty-Óskemen» tasjolynyń 889 shaqyrymyndaǵy Jarma aýdany, Arshaly aýylynyń mańynda;
3) «Semenovka» beketi – «Omby-Maıqapshaǵaı» tasjolynyń 634 shaqyrymyndaǵy Besqaraǵaı aýdany Qarabas aýylynyń tusynda;
4) «Semeı» beketi – «Omby-Maıqapshaǵaı» tasjolynyń 825 shaqyrymdaǵy Jarma aýdany Sýyqbulaq aýylynyń qasynda;
«Qysta jolǵa shyǵarda barlyǵyn muqııat josparlap, kez-kelgen jaǵdaıǵa daıyn bolǵanyńyz jón. Ár avtokólikte qıyn jaǵdaıda adam ómirin qutqaratyn: janarmaı ottyǵy, arqan, kúrek syndy birinshi kezekte qajetti zattar bolýy tıis», - dep habarlady vedomstvo ókilderi.
