Shyǵys Qazaqstanda jyl basynan beri 97 kólik órtendi
ÓSKEMEN. QazAqparat – Shyǵys Qazaqstan oblysynda jyl basynan beri 97 kólik órtendi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 2022 jyldyń basynan beri óńir boıynsha 97 kólik otqa oranǵan. Sońǵy órt 1 tamyzda saǵat 21.49-da Óskemen qalasy M.Gorkıı kóshesinde tirkeldi.
«Toqtap turǵan «Vaz 2113» markaly avtokóliginde aspaptar paneli men salonnyń ishki qaptamasy janyp ketti. Qyzyl jalynnyń jalpy aýdany 1,5 sharshy metrdi quraǵan. Oqıǵa ornyna shuǵyl jetken órt sóndirýshiler tilsiz jaýdy tolyqtaı aýyzdyqtady», - delingen aqparatta.
Departament bastyǵynyń orynbasary Serik Amangeldınniń aıtýynsha, kóliktegi órtterdiń shamamen 90%-y elektr jabdyǵyndaǵy aqaýǵa baılanysty shyǵady.
«Kún saıyn kóliktiń barlyq jerin, ásirese motor bóligin qarap shyǵý kerek. Eger bir jerde azdap maı aǵyp ketse nemese janarmaıdyń ıisi sezilse, bul maı nemese otyn qubyry zaqymdalýy múmkin degen sóz. Mundaı jaǵdaılarda kólikti tizgindeýden múlde bas tartqan jón. Biraq birden evakýatordyń kómegimen tehnıkalyq qyzmet kórsetý stantsııasyna jetkizgen durys», - dep túsindirdi ol.
