Shyǵys Qazaqstanda jyl basynan beri 80 kólik otqa oranǵan
ÓSKEMEN. QazAqparat – Shyǵys Qazaqstan oblysynda 2021 jyldyń basynan beri 80 kólik órtendi, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, óńir boıynsha kólik órti az tirkelip jatqan joq.
Jyl basynan beri 80 kólik otqa oranǵan.
Sońǵy oqıǵa búgin Óskemen qalasyndaǵy Grıboedov kóshesinde boldy.
«Tilsiz jaý «Gazel» markaly avtokólik qozǵaltqyshynyń janǵysh bólshekterin, salondy jáne aldyńǵy dońǵalaqtaryn sharpydy. Sol jerge órt sóndirýshiler jedel kelip jetti. Kóp uzamaı jalpy aýdany 4 sharshy metrdi quraǵan jalyn tolyqtaı sóndirildi. Órttiń shyǵý sebebi anyqtalyp jatyr», - dep habarlady vedomstvo ókilderi.
Qutqarýshylardyń aıtýynsha, kóliktiń tehnıkalyq jaǵdaıyn muqııat qadaǵalap, ýaqytyly tekserýden ótkizý kerek.
