Shyǵys Qazaqstanda jyl basynan beri 64 kólik órtendi
ÓSKEMEN. QazAqparat – Shyǵys Qazaqstan oblysynda bıyl 64 kólik otqa oranǵan, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, jyl basynan beri óńirde 64 kólik órtendi. Bul jalpy órt sanynyń 11%-yn qurap otyr. Kóp jaǵdaıda jalynnyń shyǵýyna – órt qaýipsizdigi erejeleriniń buzylýy sebep bolǵan.
Máselen, 9 maýsymda Jarma aýdany Áýezov kentindegi tasjolda Volkswagen avtokóliginde órt shyqty. Tilsiz jaýdyń aýmaǵy 8 sharshy metrdi qurady. Oqıǵa ornyna shuǵyl kelip jetken órt sóndirýshiler jalyndy tolyqtaı aýyzdyqtady.
Órttiń shyǵý sebebi – elektr jabdyqtaryndaǵy aqaýdan bolýy múmkin.
«Kóliktegi órt óte qaýipti. Sebebi, ol bilinbeı bastalady. Ot shyqqany kúıik pen tútin ıisi sezilgende ǵana belgili bolady. Jalyn úıdegi órtke qaraǵanda birneshe ese tez taralady. Sondyqtan júrgizýshilerge barynsha abaı bolyp, kólikti ýaqtyly teksertip, saqtyq sharalaryn qaperde ustaý qajettigin eskertemiz», - deıdi qutqarýshylar.
Esterińizge sala ketsek, osyǵan deıin ShQO ormandarynda sáýirden beri 33 órt shyqqanyn habarlaǵan edik.
