Shyǵys Qazaqstanda jyl basynan beri 50-den astam monsha órtendi
ÓSKEMEN. QazAqparat – Shyǵys Qazaqstan oblysynda jyl basynan beri 50-den astam monsha órtendi, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, monshadan shyqqan órt óte qaýipti. Sebebi qyzyl jalyn jaqyn salynǵan sharýashylyq qora-jaılarǵa lezde taralyp ketedi.
«Jyl basynan beri óńir boıynsha 50-den astam monsha otqa oranǵan. Ótken aıda osyndaı 10-ǵa jýyq órt tirkelgen. Kóp jaǵdaıda tilsiz jaýdyń shyǵý sebebi – pesh jylytý kezinde qaýipsizdik talaptaryn saqtamaý», - deıdi oblystyq TJD bastyǵynyń orynbasary Serik Amangeldın.
Monshalardaǵy órttiń negizgi sebepteri: bý bólmesindegi bitelgen murja, peshtiń nemese murjanyń aǵash ǵımarattarǵa jaqyn ornalasýy, tez tutanatyn materıaldardan qorǵalmaǵan qurylymdardyń qyzyp ketýi jáne qaraýsyz qalǵan ashyq ot.
«Tipti monshadaǵy aǵash órttiń aldyn alý úshin arnaıy suıyqtyqpen aldyn-ala maılansa da, shatyry janbaıtyn metaldan jasalsa da, qarapaıym qaýipsizdik erejelerin saqtamasańyz jalyn shyǵý qaýpi zor. Sol úshin árdaıym abaı bolý qajet», - deıdi S.Amangeldın.
