Shyǵys Qazaqstanda jyl basynan beri 28 kólik órtendi

ÓSKEMEN. QazAqparat – Shyǵys Qazaqstan oblysynda bıyl 28 kólik otqa orandy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha jyl basynan beri 28 avtokólik órtengen.

«Máselen, 1 naýryzda tańǵy saǵat 05.00 shamasynda Altaı qalasyndaǵy Tımofeev kóshesinde garajda turǵan kólikte ot shyqqan. 2014 jylǵy «Shevrole Nıva» markaly kóliginde motordyń janǵysh bólshekteri men aspaptar paneli órtendi. Aldyn ala málimet boıynsha qyzyl jalynnyń shyǵýyna – qaýiptiligi joǵary agregatty abaısyz qoldaný sebep bolǵan», - delingen aqparatta.

Sondaı-aq birneshe saǵat ótken soń qutqarýshylarǵa Óskemendegi Shákárim dańǵylynda «Gazel» avtokóliginiń órtengeni týraly habar tústi. Departament qyzmetkerleri oqıǵa ornyna shuǵyl jetip, jalpy aýdany 5 sharshy metrdi quraǵan tilsiz jaýdy aýyzdyqtady.

Statıstıka kórsetkendeı, kóp jaǵdaıda órttiń shyǵýyna – qaýipsizdik erejeleriniń saqtalmaýy sebep bolyp jatady.