Shyǵys Qazaqstanda jyl basynan beri 140-tan astam kólik órtendi
ÓSKEMEN. QazAqparat – Shyǵys Qazaqstan oblysynda bıyl 140-tan astam kólik otqa oranǵan, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, óńir boıynsha jyl basynan beri 140-tan astam kólik órtendi. Sońǵy órt ótken demalys kúni Rıdder qalasynda bolǵan.
2012 jyly shyqqan «KamAZ» júk kóligin júrip kele jatqanda jalyn sharpydy. Qozǵaltqysh bóligine, aspaptar paneline, salonǵa jaıylǵan tilsiz jaýdyń jalpy aýdany 4 sharshy metrdi quraǵan. Aldyn ala derek boıynsha órttiń shyǵýyna – qaýiptiligi joǵary agregatpen abaısyz jumys atqarý sebep boldy.
«Kólik órtteriniń shamamen 90%-y elektr symdarynyń qysqa tuıyqtalýynan, avtokóliktiń elektr jabdyqtarynyń apattyq jaǵdaıyna baılanysty shyǵady. Osy aıdyń ózinde oblysta 15 kólik janǵan. Sondyqtan júrgizýshilerdi barynsha abaı bolýǵa shaqyramyz. Kún saıyn kóliktiń barlyq bóligin, ásirese qozǵaltqyshty muqııat tekserip qarap shyǵý kerek. Eger bir jerde maı aǵyp ketse nemese benzınniń qatty ıisi sezilse, onda qandaı da bir aqaý bar bolýy múmkin», - deıdi ShQO TJD bastyǵynyń orynbasary Serik Amangeldın.
